اقوام متحدہ کے سیکریٹری جنرل انتونیو گوتریس افغانستان اور پاکستان کے درمیان بڑھتی ہوئی سرحد پار جھڑپوں کی اطلاعات پر گہری نظر رکھے ہوئے ہیں اور حالیہ تشدد میں اضافے پر شدید تشویش کا اظہار کیا ہے۔
سیکریٹری جنرل کے ترجمان اسٹیفن دوجارک کی جانب سے جاری بیان میں کہا گیا کہ گوتریس نے دونوں ممالک پر زور دیا ہے کہ وہ بین الاقوامی قانون کے تحت اپنی ذمہ داریوں، خصوصاً بین الاقوامی انسانی قانون، کی سختی سے پابندی کریں۔
شہریوں کے تحفظ کو ترجیح دینے پر زور
انتونیو گوتریس نے اس امر پر بھی زور دیا کہ جاری کشیدگی کے دوران شہریوں کے تحفظ کو اولین ترجیح دی جائے۔ انہوں نے کہا کہ موجودہ صورتحال میں فریقین کو تحمل کا مظاہرہ کرتے ہوئے ایسے اقدامات سے گریز کرنا چاہیے جو مزید جانی نقصان کا باعث بن سکتے ہیں۔
اقوام متحدہ نے ایک بار پھر بات چیت اور سفارتی ذرائع سے مسائل کے حل کی اہمیت اجاگر کی ہے تاکہ خطے میں امن و استحکام برقرار رکھا جا سکے۔
