گوگل نے اپنے ورک اسپیس ایپس میں جیمینی پر مبنی جدید فیچرز متعارف کرا دیے ہیں تاکہ کام کے بہاؤ کو مزید آسان بنایا جا سکے۔ ان اپڈیٹس کے ذریعے گوگل ڈاکس میں پہلا مسودہ خود بخود تیار کرنا، شیٹس میں مکمل اسپریڈشیٹس بنانا، سلائیڈز میں معیاری پریزنٹیشن تیار کرنا اور ڈرائیو میں موجود فائلز کے بارے میں سوالات کے جوابات دینا ممکن ہو گیا ہے۔
یہ بھی پڑھیں: گوگل نے اپنے صارفین کے لیے جیمینی3 پرو پیش کردیا، اس کی حیران کن خصوصیات کیا ہیں؟
گوگل ڈاکس میں ’ہیلپ می کریئٹ‘ ٹول متعارف کرایا گیا ہے جو صارف کے پرامپٹ کے مطابق ڈرائیو، جی میل، چیٹ اور ویب سے مواد لے کر ایک فارمیٹ شدہ پہلا مسودہ تیار کرتا ہے۔ جیمینی اب ریفرنس دستاویز کے طرزِ تحریر یا فارمیٹنگ کو بھی میچ کر سکتا ہے۔
شیٹس میں جیمینی قدرتی زبان کے پرامپٹ کے ذریعے مکمل اسپریڈشیٹ بنا سکتا ہے اور ’فِل ود جیمینی‘ فیچر ٹیبل سیلز کو خود بخود پر کر دیتا ہے، جو دستی انٹری کے مقابلے میں نو گنا تیز ہے۔ شیٹس میں متعدد آپٹیمائزیشن ٹولز بھی شامل کیے گئے ہیں جو مختلف سوالات کا حل آسان بناتے ہیں۔
سلائیڈز میں جیمینی موجودہ ڈیک کے تھیم کے مطابق انفرادی سلائیڈز بنا سکتا ہے، اور مکمل پریزنٹیشن بنانے کی سہولت بعد میں دستیاب ہوگی۔
یہ بھی پڑھیں: ایپل کے ورچوئیل اسسٹنٹ کو گوگل کا جیمینی اے آئی چلائے گا، رپورٹ
گوگل ڈرائیو میں بھی جدید اے آئی ٹولز شامل کیے گئے ہیں جن میں سرچ نتائج میں اے آئی اوورویوز اور ’آسک جیمینی‘ شامل ہیں، جو صارفین کو فائلز، ای میلز اور کیلنڈر کے بارے میں سوالات کرنے کی سہولت دیتے ہیں۔
یہ نئے فیچرز فی الحال صرف گوگل اے آئی الٹرا اور پرو سبسکرائبرز اور جیمینی الفا بزنس کسٹمرز کے لیے دستیاب ہیں اور صرف انگلش زبان میں کام کرتے ہیں۔
