ڈیپ فیک فراڈ ، میٹا نے برازیل اور چین میں متعدد افراد کے خلاف مقدمات دائر کردیے

امریکی ٹیکنالوجی کمپنی میٹا نے برازیل اور چین میں متعدد افراد اور کمپنیوں کے خلاف مقدمات دائر کیے، جنہوں نے مشہور شخصیات کے ڈیپ فیک ویڈیوز اور آواز کی نقول استعمال کر کے دھوکہ دہی کی۔

یہ بھی پڑھیں: ٹک ٹاک سوشل میڈیا ایڈکشن کیس میں تصفیہ، میٹا اور یوٹیوب کیخلاف تاریخی مقدمہ جاری

کمپنی کے مطابق مصنوعی ذہانت کی جدید ٹیکنالوجی مجرموں کو مشہور شخصیات کی آواز اور ویڈیوز کی نقل تیار کرنے میں مدد دے رہی ہے تاکہ آن لائن سرمایہ کاری کے فراڈ کو حقیقت بتایا جاسکے۔ میٹا نے کہا کہ اس نے 4 فراڈ اشتہاریوں کے خلاف مقدمات دائر کیے ہیں، جنہوں نے مشہور شخصیات اور برانڈز کی نقل کر کے لوگوں کو دھوکہ دیا۔

برازیل میں میٹا نے بی اینڈ بی سپلیمنٹس ای کوسمیٹیکوس اور بریٹس اکیڈمیہ ڈی ٹرینامینٹو کے ساتھ 2 افراد کے خلاف مقدمہ دائر کیا۔ ان پر الزام ہے کہ انہوں نے مشہور ڈاکٹر کے ڈیپ فیک ویڈیوز استعمال کر کے بغیر ریگولیٹری منظوری کے صحت کی مصنوعات کی تشہیر کی۔ بریٹس نے ایسے کورسز بھی بیچے جو یہ طریقے سکھاتے تھے۔

یہ بھی پڑھیں: ہمیں نہیں ایپ اسٹورز کو پکڑو، میٹا کا کم عمر صارفین کے لیے ’پیرینٹل کنٹرول قوانین‘ کا مطالبہ

مشہور برازیلی آنکولوجسٹ ڈاؤزیو وارلا کو بھی بریٹس نے نقالی کے لیے استعمال کیا۔ ڈاکٹر وارلا نے کہا کہ میٹا کے اقدامات ناکافی ہیں اور یہ عوامی صحت کے خلاف فراڈ کے سمندر میں صرف ایک قطرہ ہے۔

چین میں، میٹا نے شینزین یونژینگ ٹیکنالوجی کے خلاف مقدمہ دائر کیا، جو امریکی اور جاپانی صارفین کو سرمایہ کاری گروپس میں شامل ہونے کے لیے دھوکہ دینے والے اشتہارات چلاتی تھی۔

اسی طرح، ویتنام کی کمپنی لی وان لم کے خلاف بھی مقدمہ دائر کیا گیا، جس نے لگژری ہینڈ بیگز کے جعلی اشتہارات شائع کیے۔