ایران پر امریکی اور اسرائیلی حملوں کے بعد خلیج عرب میں رکے ہوئے ایک جہاز پر کئی پاکستانی ورکرز پھنس گئے ہیں، جن میں کراچی کے رہائشی سعد محبوب بھی شامل ہیں۔
سعد محبوب کے والد محبوب انور نے حکومت پاکستان سے فوری مدد کی اپیل کی ہے۔ ان کا کہنا ہے کہ ان کے بیٹے کا تعلق اختر کالونی کراچی سے ہے اور وہ پرگیس (PERGAS) نامی جہاز پر تعینات ہے۔
مزید پڑھیں: جی 7 ممالک کا اہم فیصلہ، خام تیل کی قیمت میں نمایاں کمی
محبوب انور نے وزارت خارجہ کو خط لکھ کر درخواست کی کہ ان کے بیٹے سعد محبوب کو جلد از جلد پاکستان واپس لایا جائے۔
انہوں نے نجی ٹی وی سے گفتگو میں بتایا کہ خلیج عرب میں کئی جہاز امریکی حملوں کی زد میں آکر نقصان اٹھا چکے ہیں اور پرگیس جہاز پر موجود 4 پاکستانی ورکرز کی جانیں خطرے میں ہیں۔
ان کا کہنا تھا کہ جہاز ایرانی جزیرہ کیش کے قریب کھلے سمندر میں لنگر انداز ہے اور یہ پرسین گلف شپنگ اینڈ میرین ایجنسی کی ملکیت ہے۔ معمول کے مطابق راشن 15 دن بعد پہنچایا جاتا ہے، لیکن جنگ کی وجہ سے خوراک کی فراہمی رک گئی ہے۔
محبوب انور نے بتایا کہ جہاز پر کھانے پینے کا سامان قریباً ختم ہو چکا ہے اور عملہ فاقہ کشی پر مجبور ہے۔ انٹرنیٹ اور فون سگنلز خراب ہونے کی وجہ سے بیٹے سے رابطہ بھی ممکن نہیں ہو رہا۔
مزید پڑھیں: اسرائیل کا جنوبی تہران و اصفہان پر نیا حملہ، ایران کے میزائل حملے میں ایک اسرائیلی ہلاک
انہوں نے مزید کہاکہ خلیج عرب میں پھنسے درجنوں جہازوں پر بڑی تعداد میں پاکستانی ورکرز موجود ہیں اور حکومت پاکستان سے درخواست ہے کہ میرے بیٹے سمیت تمام پاکستانیوں کو فوری طور پر وطن واپس لایا جائے۔
