پاکستان انسٹیٹیوٹ آف میڈیکل سائنسز (پمز) کی انتظامیہ نے بانی تحریکِ انصاف عمران خان کے طبی معائنے سے متعلق تفصیلی اعلامیہ جاری کیا ہے۔
اعلامیے کے مطابق آنکھوں کے ماہرین پر مشتمل میڈیکل بورڈ نے بانی پی ٹی آئی عمران خان کا معائنہ کیا، جس میں ڈاکٹر ندیم قریشی اور ڈاکٹر محمد عارف خان شامل تھے۔
میڈیکل بورڈ نے انٹرا وٹریئل انجیکشن کی دوسری خوراک کے بعد فالو اپ چیک اپ کیا۔ اس دوران دونوں آنکھوں کا تفصیلی معائنہ، فنڈواسکوپی اور او سی ٹی ٹیسٹ کیے گئے۔
پمز کے اعلامیے میں کہا گیا ہے کہ بانی پی ٹی آئی عمران خان کی بینائی میں نمایاں بہتری دیکھی گئی ہے اور موجودہ مرحلے میں ان کی بینائی تسلی بخش ہے۔
اعلامیے کے مطابق میڈیکل بورڈ نے بانی پی ٹی آئی عمران خان کے مزید علاج اور نگہداشت کے لیے ضروری ہدایات بھی جاری کردی ہیں۔
