ترکیہ کے وزیر خارنہ حاکان فیدان نے کہا ہے کہ خلیجی عرب ممالک پر ایران کی بلا امتیاز بمباری ایک ’انتہائی غلط حکمتِ عملی‘ ہے۔
ریاستی ٹی وی چینل ٹی آر ٹی نیوز کو دیے گئے انٹرویو میں حاکان فیدان نے کہا
’ایران کی جانب سے عمان، قطر، کویت، بحرین، سعودی عرب، متحدہ عرب امارات اور اردن جیسے عرب ممالک پر بلا تفریق بمباری میری رائے میں ناقابلِ یقین حد تک غلط حکمتِ عملی ہے۔‘
انہوں نے مزید کہا کہ اس طرزِ عمل سے خطے میں خطرات میں نمایاں اضافہ ہو رہا ہے اور خود ایران کے مفاد میں بھی یہ ایک بڑی غلطی ہے۔
خلیجی ریاستیں بھی نشانے پر
ایران نے امریکا اور اسرائیل کے ساتھ جاری جنگ کا دائرہ وسیع کرتے ہوئے اب سعودی عرب، متحدہ عرب امارات اور قطر جیسے امریکی اتحادی ممالک کے بنیادی ڈھانچے کو بھی نشانہ بنانا شروع کر دیا ہے۔
یہ بھی پڑھیے ایران کا دوبئی میں امریکی سفارت خانے پرحملہ، 40 امریکی اہلکار ہلاک، 70 زخمی، پاسداران انقلاب کا دعویٰ
تجزیہ کاروں کے مطابق اس اقدام سے تنازع ایک وسیع علاقائی جنگ کی شکل اختیار کر سکتا ہے، کیونکہ خلیجی ریاستیں عالمی توانائی منڈی میں کلیدی کردار ادا کرتی ہیں۔
قطر میں توانائی تنصیبات پر حملے
منگل کے روز خلیجی ممالک میں تیل اور توانائی کے بنیادی ڈھانچے پر ایرانی حملوں کی اطلاعات موصول ہوئیں۔
قطر کی سرکاری توانائی کمپنی نے 2 تنصیبات پر حملوں کے بعد بعض اہم مواد کی پیداوار عارضی طور پر روک دی ہے۔
یہ بھی پڑھیے قطر ایران کے خلاف کسی مہم کا حصہ نہیں، ترجمان وزارت خارجہ
اگرچہ مکمل نقصانات کی تفصیلات سامنے نہیں آئیں، تاہم ماہرین خبردار کر رہے ہیں کہ اگر توانائی کے مراکز مسلسل نشانہ بنتے رہے تو عالمی منڈی میں تیل اور گیس کی قیمتوں میں شدید اتار چڑھاؤ دیکھنے کو مل سکتا ہے۔
خطے میں کشیدگی میں تیزی سے اضافہ
ترکیہ کی جانب سے ایرانی حکمت عملی پر کھل کر تنقید ایسے وقت میں سامنے آئی ہے جب مشرقِ وسطیٰ پہلے ہی شدید کشیدگی کی لپیٹ میں ہے۔
انقرہ کا مؤقف اشارہ دیتا ہے کہ خطے کے کئی ممالک ایران کی موجودہ حکمتِ عملی کو خطرناک سمجھ رہے ہیں، جو نہ صرف علاقائی سلامتی بلکہ عالمی معاشی استحکام کے لیے بھی چیلنج بن سکتی ہے۔
