بنگلہ دیش پیٹرولیم کارپوریشن (بی پی سی) نے عوام میں ایندھن کے ذخائر کے بارے میں بڑھتی تشویش کے پیشِ نظر مختلف قسم کی گاڑیوں کے لیے ایندھن کی خریداری پر عارضی حدیں مقرر کر دی ہیں تاکہ سپلائی کو منظم کیا جا سکے اور ذخیرہ اندوزی سے بچا جا سکے۔
یہ بھی پڑھیں: انسانی اسمگلنگ کے شکار 165 بنگلہ دیشی لیبیا سے وطن لوٹ آئے
جمعہ کو بی پی سی کے چٹاگانگ دفتر سے جاری ہونے والے پریس ریلیز کے مطابق اس اقدام کا مقصد ایندھن کی مستحکم فراہمی کو یقینی بنانا اور صارفین و ڈیلرز کی غیر ضروری ذخیرہ اندوزی کو روکنا ہے۔
کارپوریشن کے مطابق بنگلہ دیش کی ایندھن کی تقریباً 95 فیصد ضرورت درآمدات کے ذریعے پوری ہوتی ہے جس کی وجہ سے ملک عالمی سپلائی چین میں خلل پڑنے کے اثرات سے حساس ہے۔
بین الاقوامی صورتحال کے باعث بعض اوقات درآمدات میں تاخیر ہوئی، جس نے سوشل میڈیا پر ایندھن کی دستیابی کے حوالے سے قیاس آرائی اور منفی رپورٹس کو جنم دیا۔
مزید پڑھیے: بچوں کے جنسی استحصال کے مقدمات میں مطلوب بنگلہ دیشی شہری گرفتار، الاسکا منتقل
بی پی سی کے مطابق ان رپورٹس کے نتیجے میں غیر معمولی طلب پیدا ہوئی کچھ ڈیلرز معمول سے زیادہ ایندھن ڈپو سے حاصل کرنے کی کوشش کر رہے ہیں جبکہ بعض صارفین اپنی فوری ضرورت سے زیادہ ایندھن ذخیرہ کر رہے ہیں۔
روزانہ خریداری کی حد
موٹرسائیکل: زیادہ سے زیادہ 2 لیٹر
نجی کاریں: 10 لیٹر پیٹرول یا آکٹین
ایس یو وی، جیپ اور مائیکرو بس: 20–25 لیٹر
پک اپ اور مقامی بسیں: 70–80 لیٹر
طویل فاصلے کی بسیں، ٹرک اور کنٹینر گاڑیاں: 200–220 لیٹر ڈیزل
بی پی سی نے پٹرول پمپوں کو ہدایت کی ہے کہ خریداری کے وقت نقد رسید جاری کریں اور اگلی خریداری سے قبل صارف پچھلی خریداری کی رسید دکھائے۔ ڈیلرز کو کوٹا کی سختی سے پابندی کرنے اور اسٹاک و فروخت کی تفصیلات ڈپو میں جمع کروانے کی ہدایت کی گئی ہے۔
کارپوریشن نے عوام کو یقین دلایا ہے کہ ایندھن کی درآمدات معمول کے مطابق جاری ہیں، شپمنٹس وقت پر پہنچ رہی ہیں اور ریل ٹینکر واگن کے ذریعے ملک بھر میں ڈپو تک فراہم کی جا رہی ہیں۔ توقع ہے کہ قلیل مدت میں بفر اسٹاک میں بہتری آئے گی۔
حکام نے یہ بھی واضح کیا کہ حکومت کے مقررہ نرخ سے زیادہ ایندھن فروخت کرنا جرم ہے اور ایسے عناصر کے خلاف سخت کارروائی کی جائے گی۔
مزید پڑھیں: بنگلہ دیش میں پولیس یونیفارم پر نظرِ ثانی کا امکان، پرانی وردی بحال کرنے کی سفارش
بی پی سی نے شہریوں اور ایندھن کے ڈیلرز سے تعاون کی اپیل کی ہے تاکہ ایندھن کی تقسیم بغیر رکاوٹ جاری رہے اور ملک میں سپلائی کے حوالے سے غلط فہمی یا گھبراہٹ نہ پھیلے۔
