سعودی عرب کی وزارتِ خارجہ نے ایران کی جانب سے سعودی عرب اور خلیجی ممالک کے خلاف حملوں کی سخت مذمت کرتے ہوئے کہا ہے کہ شہری تنصیبات، ہوائی اڈوں اور تیل کی تنصیبات کو نشانہ بنانا بین الاقوامی قانون اور سفارتی اصولوں کی کھلی خلاف ورزی ہے۔
وزارتِ خارجہ کے جاری کردہ بیان میں کہا گیا ہے کہ سعودی عرب اپنی سلامتی، خودمختاری اور شہریوں کے تحفظ کے لیے تمام ضروری اقدامات کرنے کا حق محفوظ رکھتا ہے۔
یہ بھی پڑھیے: فیلڈ مارشل عاصم منیر کی سعودی وزیردفاع سے ریاض میں ملاقات، سعودی عرب پر ایرانی حملوں پر تبادلہ خیال
بیان کے مطابق ایران کی جانب سے سعودی فضائی حدود کے استعمال سے متعلق عائد کیے گئے الزامات بے بنیاد ہیں، کیونکہ سعودی فضائیہ کی پروازیں صرف مملکت اور خلیجی ممالک کی فضائی حدود کی نگرانی اور حفاظت کے لیے انجام دی جاتی ہیں۔
سعودی وزارتِ خارجہ نے مزید کہا کہ ایران کی مسلسل جارحانہ کارروائیاں خطے میں کشیدگی میں اضافے کا باعث بن رہی ہیں۔ بیان میں خبردار کیا گیا کہ اگر یہ رویہ جاری رہا تو اس کے موجودہ اور مستقبل کے تعلقات پر منفی اثرات مرتب ہوں گے۔
بیان میں اس بات پر بھی زور دیا گیا کہ خطے میں استحکام برقرار رکھنے کے لیے حکمت اور ذمہ داری کا مظاہرہ ناگزیر ہے۔
