بلوچستان حکومت نے تربت میں شہریوں کے لیے گرین پیپلز بس سروس کا افتتاح کر دیا ہے، جس کا مقصد شہر میں شہری نقل و حمل کو بہتر بنانا ہے۔
اس موقع پر وزیراعلیٰ بلوچستان سرفراز بگٹی نے سرکٹ ہاؤس تربت میں اس منصوبے کا باقاعدہ افتتاح کیا۔ اس اقدام کے بعد تربت صوبے کا دوسرا شہر بن گیا ہے جہاں جدید ٹرانسپورٹ سسٹم متعارف کروایا گیا ہے۔
وزیراعلیٰ نے تقریب سے خطاب کرتے ہوئے کہا کہ یہ منصوبہ صوبے میں شہری ٹرانسپورٹ کے نظام کو بہتر بنانے کی جانب ایک اہم قدم ہے اور اس سے نہ صرف تربت کے شہری بلکہ پورے ضلع کیچ کے عوام مستفید ہوں گے۔
یہ بھی پڑھیے: بلوچستان میں تمام تعلیمی ادارے عیدالفطر کے بعد تک بند کردیے گئے
انہوں نے اعلان کیا کہ خواتین کے لیے محفوظ اور آسان سفر کو یقینی بنانے کے لیے جلد پنک بس سروس بھی متعارف کروائی جائے گی۔
حکام کے مطابق بسوں میں جدید سہولیات فراہم کی گئی ہیں، ہر بس میں 37 نشستیں موجود ہیں اور کھڑے ہو کر سفر کرنے والے مسافروں سمیت تقریباً 100 افراد ایک ساتھ سفر کر سکیں گے۔ ابتدا میں شہر کے لیے چار بسیں فراہم کی گئی ہیں۔
منصوبے کے تحت تربت کے نواحی علاقوں کو شہر سے جوڑنے کے لیے 19 کلومیٹر طویل روٹ پر 18 بس اسٹیشن قائم کیے جائیں گے، اور روزانہ تقریباً 4 ہزار 500 مسافروں کی سہولت متوقع ہے۔ حکام نے بتایا کہ روٹس اور کرایوں کے حتمی فیصلے مزید جائزے کے بعد کیے جائیں گے اور ابتدائی دو سال کے لیے مفت سفر کی تجویز بھی زیر غور ہے۔
