معروف پاکستانی ٹی وی اداکارہ مزنا وقاص نے حال ہی میں وائرل تنازعے کے بعد کرکٹر شعیب ملک سے شکوہ کیا ہے۔
مزنا وقاص نادیہ خان اور ذوہیب حسن کی رمضان اسپیشل ٹرانسمیشن میں بطور مہمان شریک ہوئیں۔ اس دوران میزبان نے سوال کیا کہ آپ کے نام کے ساتھ لوگ کنفیوژ ہوتے ہیں درست نام ’مزنا‘ ہے یا ’منزہ‘؟ جس پر مزنا وقاص نے کہا، آپ ہمیشہ میرا نام صحیح لیتی ہیں جبکہ حال ہی میں ایک شو میں میزبان بار بار میرا نام غلط لے رہے تھے حالانکہ ان کے ہاتھ میں موجود کارڈ پر میرا نام لکھا ہوا تھا۔
اداکارہ نے مزید کہا کہ یہ بات قابل قبول نہیں۔ جب کسی مہمان کو پروگرام میں مدعو کیا جائے تو انہیں مکمل پروٹوکول کے ساتھ عزت دی جانی چاہیے۔ ہمارا ذاتی کوئی جھگڑا نہیں لیکن کم از کم نام تو صحیح پکارنا چاہیے۔
اس پر نادیہ خان نے کہا کہ شعیب ملک کا اکیلے کسی بھی پروگرام کی میزبانی کرنے کا یہ پہلا تجربہ ہے اور وہ آہستہ آہستہ سیکھیں گے۔ مزنا وقاص نے واضح کیا کہ ذاتی طور پر ان کے درمیان کسی قسم کا مسئلہ نہیں ہے اور یہ سب دوستانہ انداز میں ہوا۔
وائرل ویڈیو کے حوالے سے مزنا وقاص نے کہا یہ ایک مذاق تھا میرا مقصد شعیب ملک کو نشانہ بنانا نہیں تھا۔ انہوں نے مجھے عزت کے ساتھ مدعو کیا اور جو لوگ مجھے جانتے ہیں وہ جانتے ہیں کہ یہ صرف ہمارے درمیان مزاق تھا۔
واضح رہے کہ ٹی 20 ورلڈ کپ 2026ء کی خصوصی ٹرانسمیشن کے دوران ایک ویڈیو سوشل میڈیا پر وائرل ہوئی تھی اور صارفین نے شعیب ملک پر شدید تنقید کی تھی۔ پروگرام کے دوران شعیب ملک نے مزنا وقاص سے کہا کہ آپ مجھے پہلی بار ملی ہیں آپ کو نہیں پتا چلے گا کب میں سنجیدہ ہوں اور کب ناراض، جس پر مزنا نے ہنستے ہوئے جواب دیا مجھے پتہ کر کے کرنا بھی کیا ہے آپ بھی شادی شدہ ہیں اور میں بھی۔
