وزیراعلیٰ بلوچستان میر سرفراز بگٹی کی زیر صدارت صوبائی کابینہ کا خصوصی اجلاس منعقد ہوا جس میں کفایت شعاری اقدامات کی منظوری دے دی گئی۔ اجلاس میں گورنر بلوچستان، اسپیکر صوبائی اسمبلی اور اتحادی جماعتوں کے پارلیمانی لیڈرز نے بھی خصوصی شرکت کی۔
کابینہ اجلاس میں فیصلہ کیا گیا کہ کفایت شعاری مہم کا آغاز وزیر اعلیٰ سیکریٹریٹ سے کیا جائے گا، جس کے تحت آٹھ سو کے لگ بھگ غیر ضروری آسامیاں تحلیل کردی گئیں۔
سرکاری اخراجات اور ایندھن کی بچت کے لیے جامع پالیسی
بلوچستان حکومت نے سرکاری اخراجات کم کرنے اور ایندھن کی بچت کے لیے جامع پالیسی نافذ کرنے کا فیصلہ کیا ہے۔
کابینہ کے فیصلے کے مطابق صوبائی وزراء، مشیران اور پارلیمانی سیکرٹریز دو ماہ کی تنخواہ نہیں لیں گے جبکہ اراکین صوبائی اسمبلی کی تنخواہوں میں 25 فیصد رضاکارانہ کٹوتی کی منظوری دی گئی ہے۔
کابینہ اجلاس میں یہ بھی فیصلہ کیا گیا کہ گریڈ 20 اور اس سے اوپر کے اعلیٰ افسران دو دن کی تنخواہ رضاکارانہ طور پر دیں گے جبکہ صحت اور تعلیم کے شعبوں کے ملازمین کو تنخواہوں کی کٹوتی سے استثنیٰ حاصل ہوگا۔
سرکاری اجلاس ویڈیو لنک کے ذریعے ہوں گے
سرکاری اجلاس اب زیادہ تر ویڈیو لنک کے ذریعے منعقد کیے جائیں گے تاکہ غیر ضروری سفری اخراجات ختم کیے جا سکیں۔
سرکاری عشائیوں پر پابندی
کابینہ اجلاس میں فیصلہ کیا گیا کہ غیر ملکی وفود کے علاوہ سرکاری عشائیوں پر پابندی عائد کردی گئی ہے جبکہ سیمینارز اور ٹریننگز کے لیے پیشگی اجازت لازمی قرار دی گئی ہے۔
سرکاری دفاتر میں چار روزہ ورک ویک متعارف کروانے کا فیصلہ کیا گیا ہے جبکہ پچاس فیصد عملہ گھر سے کام کرے گا۔
نجی شعبے کے لیے بھی تجویز
نجی شعبے کو بھی آدھا عملہ گھر سے کام کروانے اور چار روزہ دفتری ہفتہ اپنانے کی تجویز دی گئی ہے۔
تعلیمی اداروں میں بہار کی تعطیلات
صوبے کے تمام تعلیمی اداروں میں 23 مارچ 2026 تک بہار کی تعطیلات کا اعلان کیا گیا ہے تاہم امتحانات اپنے مقررہ شیڈول کے مطابق جاری رہیں گے اور تعطیلات کا اطلاق امتحانات پر نہیں ہوگا۔
کابینہ نے فیصلہ کیا کہ شادی بیاہ کی تقریبات میں مہمانوں کی تعداد 200 تک محدود ہوگی اور صرف ایک ڈش کی اجازت ہوگی جبکہ ہائی ویز پر گاڑیوں کی رفتار 65 سے 80 کلومیٹر فی گھنٹہ رکھنے کی ہدایت بھی جاری کی گئی ہے۔
مشکل معاشی حالات میں حکومت نے خود مثال قائم کی، وزیراعلیٰ
وزیراعلیٰ بلوچستان میر سرفراز بگٹی نے اجلاس سے خطاب کرتے ہوئے کہا کہ مشکل معاشی حالات میں حکومت نے خود مثال قائم کی ہے اور وسائل عوامی فلاح پر خرچ ہوں گے۔ انہوں نے کہا کہ قومی وسائل کے ضیاع کی کوئی گنجائش نہیں اور تمام ادارے کفایت شعاری پالیسی پر سختی سے عمل کریں۔
