سندھ حکومت نے عالمی سطح پر پیدا ہونے والے بحران اور ایندھن کی بچت کے پیش نظر صوبے کی تمام سرکاری اور نجی جامعات میں 16 سے 31 مارچ تک آن لائن کلاسز کرانے کا فیصلہ کر لیا ہے۔
یہ بھی پڑھیں:خیبرپختونخوا میں تعلیمی ادارے اب ہفتے میں 4 روز کھلیں گے
صوبائی وزیر جامعات اسماعیل راہو نے اعلان کیا ہے کہ سندھ کی تمام سرکاری و نجی جامعات میں 16 سے 31 مارچ تک تدریسی سرگرمیاں آن لائن جاری رکھی جائیں گی۔ ان کا کہنا تھا کہ اس فیصلے کا مقصد ایندھن کے استعمال میں کمی اور موجودہ عالمی صورتحال کے اثرات سے نمٹنا ہے۔
میڈیا رپورٹ کے مطابق سندھ حکومت نے جامعات کی سرکاری گاڑیوں کے استعمال اور ایندھن کے کوٹے میں بھی 50 فیصد کٹوتی کا فیصلہ کیا ہے، جبکہ ہدایت کی گئی ہے کہ جامعات کی تقریباً 60 فیصد گاڑیاں فوری طور پر گراؤنڈ کر دی جائیں۔
وزیر جامعات نے بتایا کہ عالمی سطح پر پیدا ہونے والے بحران کے باعث آئندہ 2 ماہ تک تمام سرکاری محکموں کے ایندھن کے استعمال میں بھی 50 فیصد کمی کی جائے گی تاکہ اخراجات کو کم کیا جا سکے۔
یہ بھی پڑھیں: پنجاب کے تعلیمی ادارے 31 مارچ تک بند، صوبائی وزرا و افسران کو سرکاری فیول نہیں ملے گا
واضح رہے کہ مشرق وسطیٰ میں جاری جنگی صورتحال اور ایندھن کی قیمتوں میں اضافے کے باعث پنجاب کے بعد سندھ حکومت نے بھی احتیاطی اقدامات کے طور پر تعلیمی اداروں کے لیے یہ فیصلہ کیا ہے۔
