پاکستان کے فاسٹ بولر زمان خان قومی ٹی20 کپ 2026 کے میچ کے دوران انجری کا شکار ہوگئے۔
کرکٹ بورڈ پاکستان کرکٹ بورڈ کے مطابق زمان خان کو نیشنل ٹی20 کپ 2026 میں پشاور کے عمران خان کرکٹ اسٹیڈیم میں کھیلے گئے میچ کے دوران فیلڈنگ کرتے ہوئے دائیں کندھے کے جوڑ (ایکرومیوکلیویکولر جوائنٹ) میں ڈس لوکیشن ہوگئی۔
کرکٹ بورڈ کے بیان کے مطابق 24 سالہ فاسٹ بولر فیصل آباد کرکٹ ٹیم کی جانب سے کھیلتے ہوئے پشاور کرکٹ ٹیم کے خلاف میچ میں فیلڈنگ کے دوران زخمی ہوئے۔
یہ بھی پڑھیے: کرکٹ کی تاریخ کا انوکھا رن آؤٹ، بنگلہ دیش کے خلاف سلمان علی آغا مایوس ہوکر پویلین لوٹے
پی سی بی کا کہنا ہے کہ زمان خان 14 مارچ کو نیشنل کرکٹ اکیڈمی لاہور میں رپورٹ کریں گے، جہاں پی سی بی کی میڈیکل ٹیم کے مشورے سے ان کے علاج اور بحالی کے پروگرام کا فیصلہ کیا جائے گا۔
زمان خان کی انجری پاکستان سپر لیگ کے 11ویں ایڈیشن کے آغاز سے محض 12 روز قبل سامنے آئی ہے، جس کے باعث ٹورنامنٹ میں ان کی شرکت غیر یقینی ہوگئی ہے۔
واضح رہے کہ زمان خان کو پنڈیز نے پی ایس ایل 11 کے لیے گولڈ کیٹیگری میں برقرار رکھا تھا۔ ٹیم اپنا پہلا میچ 28 مارچ کو پشاور زلمی کے خلاف پشاور میں کھیلے گی۔
