پاکستان اور بنگلہ دیش کے درمیان جاری ون ڈے انٹرنیشنل میچ میں ایک نادر اور غیر معمولی واقعہ پیش آیا، جس نے کرکٹ کے شائقین کو حیران کر دیا۔
بنگلہ دیش کے خلاف دوسرے ون ڈے میچ کے 38.3 اوورز میں پاکستان کا اسکور 227 رنز پر 3 وکٹوں کے نقصان پر تھا۔ محمد رضوان اور سلمان علی آغا کے درمیان 100 سے زیادہ رنز کی شراکت قائم تھی۔ اس دوران بنگلہ دیش کے آف اسپنر مہدی حسن میراز کی گیند پر سلمان علی آغا نے گیند کو واپس بولر کی طرف کھیلا۔
یہ بھی پڑھیں: کرکٹ کی تاریخ میں ہونے والے انوکھے آؤٹ
سلمان، جو نان سٹرائیکر اینڈ پر تھے، کریز سے باہر آئے، شاید گیند اٹھانے یا بولر کی مدد کرنے کے لیے، لیکن مہدی حسن میراز نے فوری طور پر انڈر آرم تھرو کر کے وکٹوں کو نشانہ بنایا۔ تھرڈ امپائر کمار دھرمسینا نے ری پلے دیکھنے کے بعد فیصلہ سنایا کہ سلمان کا بیٹ کریز میں نہیں پہنچا تھا اور وہ آؤٹ ہیں۔
کرکٹ کی ہسٹری میں انوکھا آؤٹ pic.twitter.com/onL8nEJulg
— Awais Yousaf Zai (@awaisReporter) March 13, 2026
بڑی اسکرین پر “OUT” کا اشارہ دیکھ کر سلمان علی آغا مایوس ہو کر پویلین واپس لوٹ گئے۔ کمنٹیٹرز نے اسے تکنیکی طور پر درست قرار دیا، لیکن اسپورٹس مین شپ کے حوالے سے بحث چھڑ گئی کہ آیا بولر کو ایسا کرنا چاہیے تھا یا نہیں۔
یہ بھی پڑھیں: ایک ہی بال پر چھکا بھی اور وکٹ بھی، یہ عجیب واقعہ کیسے ہوا؟
یہ واقعہ سوشل میڈیا پر وائرل ہوگیا، جہاں صارفین کی آرا ملی جلی ہیں۔ کچھ لوگوں نے میراز کی حاضر دماغی کی تعریف کی، جبکہ دیگر نے سلمان کی غلطی پر غصے کا اظہار کیا اور کہا کہ بیٹسمین کو کریز میں واپس آنا چاہیے تھا۔ کچھ نے یہ بھی کہا کہ بنگلہ دیش کو اسپورٹس مین شپ کا مظاہرہ کرنا چاہیے تھا۔
میرپور کے شیر بنگلہ نیشنل سٹیڈیم میں کھیلے جانے والے اس میچ میں سلمان علی آغا نے 64 رنز کی اننگز کھیلی، جو پاکستان کے لیے اہم رہی۔ اب شائقین یہ دیکھ رہے ہیں کہ یہ نادر رن آؤٹ میچ کے نتیجے پر کس حد تک اثر ڈالے گا۔
