بنگلہ دیش حکومت نے ملک بھر میں نہروں، دریاؤں اور پانی کے ذخائر کی کھدائی اور دوبارہ کھدائی کے لیے ملک گیر پروگرام کا اعلان کیا ہے، جس کا باضابطہ افتتاح وزیر اعظم طارق رحمان 16 مارچ کو کریں گے۔
وزارت پانی کے وسائل کے ایک سرکاری بیان کے مطابق اس منصوبے کے تحت حکومت اگلے 5 سالوں میں ملک بھر میں تقریباً 20,000 کلومیٹر دریاؤں، نہروں اور آبی ذخائر کی کھدائی کرے گی تاکہ آبپاشی، پانی کے انتظام اور زرعی پیداوار میں بہتری لائی جا سکے۔
یہ بھی پڑھیے: بنگلہ دیش پارلیمنٹ: صدر کے خطاب پر اپوزیشن کا واک آؤٹ، وزیرِ داخلہ نے تضاد قرار دیدیا
منصوبے کے پہلے مرحلے میں 54 اضلاع میں کام شروع کیا جائے گا۔ وزیر اعظم ضلع دیناج پور کے تحصیل کہارول میں نہروں کی کھدائی کا افتتاح کریں گے، جبکہ دیگر وزراء، مشیران، پارلیمنٹ کے اراکین اور سینیئر حکام باقی اضلاع میں بیک وقت پروگرام کا آغاز کریں گے۔
سرکاری حکام کا کہنا ہے کہ یہ منصوبہ زرعی پیداوار بڑھانے، آبپاشی کے نظام کو بہتر بنانے اور دیہی روزگار کے مواقع فراہم کرنے میں اہم کردار ادا کرے گا۔ اس کے علاوہ اس اقدام سے سطحی پانی کے ذخائر میں اضافہ، زیر زمین پانی پر انحصار کم کرنے اور ملک کے مختلف حصوں میں خشک سالی، سیلاب اور پانی جمع ہونے کے اثرات کو کم کرنے میں مدد ملے گی۔
حکومتی ذرائع کے مطابق یہ پروگرام بنگلہ دیش میں پانی کے وسائل کے انتظام کو مضبوط بنانے اور طویل مدتی غذائی تحفظ کو یقینی بنانے کے لیے ایک وسیع تر کوشش کا حصہ ہے۔
