بالی ووڈ کے معروف اداکار نوازالدین صدیقی نے بالی وڈ میں حالیہ بننے والی فلموں پر تشویش کا اظہار کرتے ہوئے کہا ہے کہ صنعت میں ’جعلی‘ فلمیں زیادہ بن رہی ہیں اور یہ ناظرین کو گمراہ کر سکتی ہیں۔
ان کا کہنا تھا کہ سماج کو غلط سمت میں لے جانے کی ضرورت نہیں ہے۔ سچائی بہت اہم ہے اور آج کے ہر انسان کو یہ معلوم ہے کہ اصل حقیقت کیا ہے۔ انہوں نے مزید کہا کہ آج کے ناظرین عالمی حالات سے باخبر ہیں اور آسانی سے سمجھ سکتے ہیں کہ فلموں میں بیانیے کس مقصد کے لیے بنائے جا رہے ہیں۔
Reporter: Are directors making narrative-based movies?
Nawaz: We all know propaganda movies are being made,most of them are fake, even you know it's fake & narratives are being set. Don't make me open my mouth
Nawaz gives a tight slap to movies like Kerala Story 2 & Dhurandhar. pic.twitter.com/oCgZNJILWc
— Nehr_who? (@Nher_who) March 14, 2026
اداکار کا کہنا تھا کہ جھوٹی اور جعلی فلمیں بن رہی ہیں ہمارے یہاں۔ دنیا میں کیا ہو رہا ہے سب جانتے ہیں۔ اصل سچائی کیا ہے یہ بھی سب جانتے ہیں۔ یہ بیانات اس سوال کے جواب میں آئے کہ عالمی تنازعات کے پیش نظر کیا فلم سازوں کو ذمہ دار کہانی سنانے کے ذریعے معاشرے کی رہنمائی کرنی چاہیے۔
اداکار نے یہ موقف پیش کر کے ایک بار پھر بالی ووڈ میں یہ بحث چھیڑ دی ہے کہ کیا سینما کا مقصد صرف تفریح ہے یا اسے سچائی اور سماجی ذمہ داری کے اصولوں پر بھی قائم رہنا چاہیے۔
یہ بھی پڑھیں: ’بالی ووڈ چور ہے کبھی گانے چراتا ہے کبھی کہانیاں‘، نواز الدین صدیقی
اس سے قبل بھی نواز الدین صدیقی نے بالی ووڈ کو تنقید کا نشانہ بنایا تھا۔ ان کا کہنا تھا کہ ’ہماری انڈسٹری میں ایک ہی چیز کو 5 سال تک دہرایا جاتا ہے پھر جب لوگ اس سے بور ہو جاتے ہیں تو اسے چھوڑ دیا جاتا ہے‘۔
ان کا مزید کہنا تھا کہ ’دراصل عدم تحفظ بہت بڑھ گیا ہے اور بالی ووڈ کو لگتا ہے کہ اگر کوئی فارمولا چل رہا ہے تو اسے ہی چلاتے رہو، اسے رگڑتے رہو۔ اور اس سے بھی زیادہ افسوسناک بات یہ ہے کہ اب 2، 3، 4 (سیکوئلز) بننے لگ گئے ہیں۔ جیسے مالی دیوالیہ پن ہوتا ہے، ویسے ہی یہ تخلیقی دیوالیہ پن ہوگیا ہے۔ بہت زیادہ کنگالی ہے۔ شروع سے ہماری انڈسٹری چوری کرتی آ رہی ہے۔ ہم نے گانے چرائے، کہانیاں چرائیں‘۔
نوازالدین صدیقی کو حال ہی میں نیٹ فلکس کی کرائم تھرلر Raat Akeli Hai: The Bansal Murders میں دیکھا گیا۔
اداکار کے مستقبل میں کئی منصوبے زیرِ غور ہیں اور حال ہی میں یہ تصدیق ہوئی ہے کہ وہ ۲۰۱۸ کی نہایت مقبول اور تنقیدی تعریف یافتہ ہارر-فینٹسی فلم Tumbbad کے سیکوئل کے کاسٹ میں شامل ہوں گے۔
