نشاط گروپ کی ذیلی کمپنی نیکس جن آٹو کی جانب سے پاکستان میں جیکو جے 8 پلگ اِن ہائبرڈ ایس یو وی متعارف کرانے کی تیاریاں کیے جانے کا امکان ظاہر کیا جا رہا ہے۔ تاہم کمپنی کی طرف سے تاحال اس حوالے سے کوئی باضابطہ اعلان نہیں کیا گیا۔
جیکو برانڈ چین کی چیری گروپ کے تحت کام کرتا ہے، جبکہ جے 8 پی ایچ ای وی کا پلیٹ فارم اور ہائبرڈ سسٹم چیری ٹیگو 9 پی ایچ ای وی سے ملتا جلتا ہے۔ دونوں گاڑیاں چیری کے ٹی ون ایکس پلیٹ فارم پر تیار کی گئی ہیں اور ایک جیسا ہائبرڈ پاور ٹرین استعمال کرتی ہیں۔
یہ بھی پڑھیے: ہنڈائی نشاط موٹرز کی پالیسیڈ ایس یو وی پاکستان میں متعارف
بین الاقوامی سطح پر جیکو جے 8 کو پہلی بار 2025 میں آسٹریلیا اور ملائیشیا جیسے ممالک میں پیٹرول ٹربو انجن کے ساتھ متعارف کرایا گیا تھا، جبکہ اس کا پلگ اِن ہائبرڈ ورژن اب مختلف ممالک میں پیش کیا جا رہا ہے۔ یہ گاڑی اس وقت انڈونیشیا میں دستیاب ہے اور سعودی عرب، متحدہ عرب امارات، یورپ اور آسٹریلیا سمیت دیگر ممالک میں بھی متعارف یا بکنگ کے لیے پیش کی جا چکی ہے۔
جیکو جے 8 پی ایچ ای وی ایک بڑی سات نشستوں والی ایس یو وی ہے جس میں 2+3+2 سیٹنگ ترتیب دی گئی ہے۔ گاڑی کی لمبائی تقریباً 4,820 ملی میٹر، چوڑائی 1,930 ملی میٹر اور اونچائی 1,710 ملی میٹر ہے، جبکہ وہیل بیس 2,820 ملی میٹر ہے۔
یہ بھی پڑھیے: ہونڈا کی پہلی ہائبرڈ ایس یو وی کی بکنگ شروع، آپ بھی ٹیسٹ ڈرائیو کرکے دیکھیں
بین الاقوامی معیار کے مطابق اس گاڑی میں 1.5 لیٹر ٹربو پلگ اِن ہائبرڈ انجن دیا گیا ہے جو ملٹی موٹر سیٹ اپ اور ہائبرڈ ٹرانسمیشن کے ساتھ کام کرتا ہے۔ یہ نظام تقریباً 530 ہارس پاور اور 650 نیوٹن میٹر ٹارک پیدا کرتا ہے، جبکہ اسے آل وہیل ڈرائیو سسٹم کے ساتھ جوڑا گیا ہے۔
اگر یہ گاڑی پاکستان میں متعارف کرائی گئی تو اس کا مقابلہ پریمیم ہائبرڈ ایس یو وی سیگمنٹ میں ہوگا، جہاں اس کا قریبی حریف چیری ٹیگو 9 پی ایچ ای وی ہوگا، جس کی ایکس فیکٹری قیمت اس وقت تقریباً ایک کروڑ 37 لاکھ روپے ہے۔
