بنگلہ دیش نے برطانیہ سے پولیس اصلاحات اور روہنگیا مسئلے میں تعاون کی درخواست کردی ہے۔
بنگلہ دیش کے وزیر داخلہ صلاح الدین احمد نے ویانا میں عالمی فراڈ سمٹ کے دوران برطانیہ کے ہوم آفس کے وزیر برائے ریاست، لارڈ ہنسن کے ساتھ دو طرفہ ملاقات کی، جس میں سیکیورٹی تعاون، پولیس اصلاحات اور روہنگیا بحران پر بات چیت کی گئی۔
یہ بھی پڑھیں: برطانیہ کا بنگلہ دیش میں روہنگیا مہاجرین کے لیے امداد جاری رکھنے کے عزم کا اعادہ
ملاقات سمٹ کے دوسرے روز ہوئی اور دونوں ممالک کے درمیان باہمی سیکیورٹی اور اسٹریٹجک دلچسپی کے امور پر توجہ مرکوز رہی۔
وزیر داخلہ نے برطانیہ کے ساتھ بنگلہ دیش کے طویل المدتی تاریخی تعلقات کو سراہتے ہوئے حکومت کے عزم کا اظہار کیا کہ وہ دفاع، دہشتگردی کے خلاف کارروائی اور سمندری سیکیورٹی میں تعاون کو مزید مضبوط کرے گی۔ لارڈ ہنسن نے بھی دونوں ممالک کے اسٹریٹجک شراکت داری کو بڑھانے پر اتفاق کیا۔
صلاح الدین احمد نے 2026 کے قومی انتخابات کے بعد برطانیہ کی جانب سے بنگلہ دیش کو فراہم کیے جانے والے تعاون کا شکریہ ادا کیا اور کہا کہ موجودہ حکومت ملک میں استحکام، جمہوری عمل اور اچھے حکمرانی کو برقرار رکھنے کے لیے پرعزم ہے۔
یہ بھی پڑھیں: بنگلہ دیش: سابق وزیر کی برطانیہ میں موجود جائیدادیں ضبط کرنے کا حکم
انہوں نے حال ہی میں ڈھاکہ میں برطانوی ہائی کمشنر سارہ کوک سے ہونے والی بات چیت کا حوالہ بھی دیا اور سیکیورٹی سیکٹر اصلاحات، مہاجرین کے انتظام اور فوجداری انصاف میں قریبی تعاون کی ضرورت پر زور دیا۔
ملاقات کے دوران پولیس اصلاحات اور جدید کاری کو اہم موضوع قرار دیا گیا۔ وزیر داخلہ نے برطانیہ سے تکنیکی معاونت اور تربیت کی درخواست کی، اور کہا کہ برطانوی پولیسنگ کے تجربے اور پیشہ ورانہ معیار کو بنگلہ دیش میں جدید، عوام دوست پولیس فورس کے قیام کے لیے ماڈل کے طور پر اپنانا مفید ہوگا۔
روہنگیا مسئلہ بھی بات چیت میں نمایاں رہا۔ بنگلہ دیشی وزیر نے برطانیہ سے درخواست کی کہ وہ برمی حکومت پر بین الاقوامی دباؤ جاری رکھے تاکہ بے گھر روہنگیا مسلمانوں کی محفوظ اور پائیدار واپسی ممکن ہو سکے۔ انہوں نے کہا کہ انسانی ہمدردی کی حمایت اور بین الاقوامی شمولیت خطے میں استحکام برقرار رکھنے کے لیے ضروری ہے۔
یہ بھی پڑھیں: برطانیہ میں غربت کی انتہا: نئی تصویر سامنے آ گئی، بنگلہ دیشی اور پاکستانی کمیونٹیز سب سے زیادہ متاثر
لارڈ ہنسن نے بنگلہ دیش کے کردار کی تعریف کی اور سیکیورٹی سیکٹر میں اصلاحات کے اقدامات کو سراہا، ساتھ ہی تعاون کی یقین دہانی کروائی۔
، وزارت داخلہ کے بیان کے مطابق ملاقات میں بنگلہ دیش اور برطانیہ کے سفارتی مشنز کے افسران بھی موجود تھے.
