پاکستانی اداکارہ علیزے شاہ نے اپنے ساتھی اداکار یاسر نواز کی طرف سے حالیہ تعریف کے باوجود ان کے ساتھ دوبارہ کام کرنے سے صاف انکار کر دیا، جس سے ان کے پرانے اختلافات دوبارہ خبروں کی زینت بن گئے۔
یاد رہے کہ علیزے شاہ اور یاسر نواز نے پہلے ڈرامہ میرا دل میرا دشمن میں کام کیا تھا، جس دوران ان کے درمیان اختلافات پیدا ہوئے جو طویل عرصے تک جاری رہے۔
یاسر نواز نے جون 2021 میں ایکسپریس ٹی وی پر احسن خان کے شو میں اہلیہ ندا یاسر کے ہمراہ شرکت کی تھی، جہاں انہوں نے علیزے شاہ کے ساتھ کام کرنے کے تجربے کو بھیانک قرار دیتے ہوئے کہا تھا کہ وہ ان کے ساتھ کام کرکے پچھتا رہے ہیں۔
یہ بھی پڑھیے وارننگ کے بعد یاسر نواز کا حیران کن یوٹرن، علیزے شاہ کو کیا پیشکش کی؟
ان کی اہلیہ ندا یاسر نے بھی پروگرام میں بتایا تھا کہ ان کے شوہر علیزے شاہ کے ساتھ کام کرکے پچھتا رہے ہیں اور اداکارہ نے ان کے میاں کے ساتھ غلط کیا۔
اس کے بعد دونوں نے سوشل میڈیا پر ایک دوسرے کے خلاف تنقیدی تبصرے بھی کیے۔
تازہ لڑائی کس بات پر ہوئی؟
یہ معاملہ اس وقت دوبارہ کھڑا ہوا جب یاسر نواز نے احسن خان کے شو پر علیزے کے بارے میں اپنی رائے کا اظہار کیا۔
اس کے جواب میں علیزے شاہ نے ان پر غیر مناسب رویے کا الزام لگایا اور خبردار کیا کہ اگر یہ سلسلہ جاری رہا تو وہ مزید معلومات عوام کے سامنے لائیں گی۔
علیزے کا سخت ردعمل
بعدازاں حال ہی میں یاسر نواز نے ایک رمضان شو میں علیزے کی صلاحیتوں کی تعریف کی اور کہا کہ وہ دوبارہ ان کے ساتھ کام کرنا پسند کریں گے۔
رمضان ٹرانسمیشن میں میزبان جویریہ سعود نے یاسر نواز سے سوال کیا کہ اگر وہ علیزے شاہ کو کسی پراجیکٹ میں کاسٹ کریں تو انہیں کون سا کردار دیں گے؟
یہ بھی پڑھیں: اب میرا نام لیا تو عدالت لے جاؤں گی، علیزے شاہ کی یاسر نواز کو آخری وارننگ
اس پر یاسر نواز نے جواب دیتے ہوئے کہا کہ علیزے شاہ ایک باصلاحیت اداکارہ ہیں اور وہ انہیں مرکزی کردار (ہیروئن) کے طور پر کاسٹ کریں گے۔
لیکن علیزے نے اس پیشکش کو سختی سے مسترد کرتے ہوئے کہا ’میری جُوتی کرتی ہے، اب ان کے ساتھ کام نہیں کروں گی۔‘
تعلقات کی بحالی اب بھی ناممکن
حالیہ مصالحانہ کوششوں کے باوجود، علیزے شاہ اور یاسر نواز کے درمیان اختلافات ابھی تک حل نہیں ہوئے اور یہ شوبز حلقوں میں ایک متنازعہ معاملہ بن گیا ہے۔
