بچے اے آئی کیسے استعمال کرتے ہیں، بیشتر والدین بے خبر

والدین کو اس بات کا درست اندازہ نہیں کہ ان کے بچے مصنوعی ذہانت یعنی اے آئی کو کس طرح استعمال کر رہے ہیں۔

یہ بھی پڑھیں: انسانی جذبات کو سمجھنے والی اے آئی، مگر کیا اس پر اعتماد کیا جا سکتا ہے؟

نئی تحقیق سے انکشاف ہوا ہے کہ ہوم ورک سے لے کر جذباتی مدد تک اے آئی بچوں کی زندگی میں اہم کردار ادا کر رہا ہے۔

روزمرہ زندگی میں اے آئی کا بڑھتا استعمال

نیویارک کی 17 سالہ طالبہ آئسس جوزف کے مطابق اے آئی ان کی روزمرہ زندگی کا لازمی حصہ بن چکا ہے۔ وہ اسے روزانہ استعمال کرتی ہیں۔ ہوم ورک میں مدد لینے، کھانے کی جگہ منتخب کرنے، شاعری کے لیے خیالات حاصل کرنے اور ذاتی مسائل پر مشورہ لینے کے لیے بھی اے آئی ان کی رہنمائی کے لیے پیش پیش ہے۔

ان کا کہنا ہے کہ والدین اکثر اے آئی کو ایک خطرہ سمجھتے ہیں حالانکہ یہ مجموعی طور پر ایک مفید ٹیکنالوجی ہے۔

والدین اور بچوں کے درمیان واضح فرق

تحقیقاتی اداروں پیو ریسرچ سینٹر اور کامن سینس میڈیا کی رپورٹس کے مطابق والدین اور بچوں کے درمیان اے آئی کے استعمال کے حوالے سے واضح فرق پایا جاتا ہے۔

مزید پڑھیے: اے آئی چیٹ بوٹ ’اپنی والدہ‘ کو یاد کرکے جذباتی، صارفین دنگ

جب والدین سے پوچھا گیا کہ کیا ان کے بچے اے آئی استعمال کرتے ہیں تو صرف 51 فیصد نے ہاں کہا جبکہ حقیقت میں 64 فیصد بچوں نے بتایا کہ وہ چیٹ بوٹس استعمال کرتے ہیں۔

مزید یہ کہ 40 فیصد والدین نے کبھی اپنے بچوں سے اے آئی کے بارے میں بات ہی نہیں کی۔

گھروں میں گفتگو کا فقدان

ماہرین کے مطابق گھروں میں اے آئی کے حوالے سے بات چیت نہ ہونے کے برابر ہے جو ایک سنگین مسئلہ ہے۔

ان کا کہنا ہے کہ خاندانوں کو چاہیے کہ وہ مل کر اس ٹیکنالوجی کو سمجھیں، بجائے اس کے کہ بچوں کو خود ہی اس کا استعمال سیکھنے دیا جائے۔

جذباتی مدد کے لیے اے آئی کا استعمال

تحقیق سے معلوم ہوا کہ کچھ بچے اے آئی کو جذباتی مدد اور مشورے کے لیے بھی استعمال کرتے ہیں جو والدین کے لیے تشویش کا باعث بن سکتا ہے۔

58 فیصد والدین اس بات سے متفق نہیں کہ ان کے بچے اے آئی سے جذباتی مدد لیں جبکہ 20 فیصد اس بارے میں غیر یقینی کا شکار ہیں۔ اس کے باوجود کچھ بچے واقعی ایسا کر رہے ہیں۔

آئسس جوزف کے مطابق وہ کبھی کبھار اے آئی سے اپنے جذبات اور مسائل پر بات کرتی ہیں جو انہیں مختلف زاویوں سے سوچنے میں مدد دیتا ہے۔ تاہم وہ اس بات سے آگاہ ہیں کہ اے آئی ایک مشین ہے اس لیے اس کے مشوروں کو احتیاط سے لیتی ہیں۔

تعلیم میں اے آئی کا کردار

زیادہ تر بچے اے آئی کو تعلیم کے لیے استعمال کرتے ہیں جیسے معلومات تلاش کرنا، تحقیق کرنا اور ریاضی یا لکھائی میں مدد لینا۔

تقریباً آدھے بچے تحقیق کے لیے اے آئی استعمال کرتے ہیں جبکہ کچھ بچے اپنی زیادہ تر پڑھائی بھی اے آئی کی مدد سے کرتے ہیں۔

اگرچہ کم بچے خود مانتے ہیں کہ وہ نقل کرتے ہیں لیکن 59 فیصد طلبہ کا کہنا ہے کہ ان کے اسکول میں دوسرے بچے اے آئی کے ذریعے نقل کرتے ہیں۔

تفریح کے لیے بھی اے آئی مقبول

47 فیصد بچے اے آئی کو تفریح کے لیے بھی استعمال کرتے ہیں جیسے تصاویر بنانا یا دلچسپ مواد تخلیق کرنا۔

کامن سینس میڈیا کی تحقیق کے مطابق 52 فیصد والدین سمجھتے ہیں کہ اسکول کے کام میں اے آئی کا استعمال غیر اخلاقی ہے جبکہ اتنے ہی فیصد بچے اسے جدید اور قابل حوصلہ افزائی سمجھتے ہیں۔

بچے عام طور پر اے آئی کے استعمال میں زیادہ پراعتماد ہیں۔ 92 فیصد بچوں کا کہنا ہے کہ وہ پہچان سکتے ہیں کہ وہ اے آئی سے بات کر رہے ہیں یا کسی انسان سے جبکہ والدین میں یہ شرح 73 فیصد ہے۔

مزید پڑھیں: اے آئی سے دوستی کا رجحان کہیں حقیقی زندگی سے دوری کی شروعات تو نہیں؟

ماہرین کے مطابق نوجوان نئی ٹیکنالوجی کو زیادہ تیزی سے اپناتے ہیں اور اس کے استعمال کے نئے طریقے تلاش کرتے ہیں اس لیے والدین کو چاہیے کہ وہ بچوں کے ساتھ کھل کر بات کریں اور ان کی رہنمائی کریں۔