پاکستانی اداکار حمزہ علی عباسی اور ان کی اہلیہ نمل خاور نے شادی کے خواہشمند افراد کے لیے نئی رشتہ ایپ متعارف کرا دی ہے جس کا نام میرج 4 لائف رکھا گیا ہے۔ اس ایپ کا مقصد اسلامی اقدار کے مطابق شریکِ حیات کی تلاش کو آسان بنانا بتایا جارہا ہے۔
یہ بھی پڑھیں: رشتہ ایپس پر موجود پروفائلز کی تصدیق کیسے کی جاسکتی ہے؟
حمزہ علی عباسی کے مطابق اس ایپ کی خاص بات مختلف ممالک میں قائم دفاتر ہیں، جن میں برطانیہ، ناروے، پیرس، ڈنمارک اور لاہور شامل ہیں۔ ان دفاتر کا مقصد صرف رشتے کروانا نہیں بلکہ شادی سے پہلے اور بعد میں مشاورت کی سہولت فراہم کرنا بھی ہے۔ انہوں نے بتایا کہ مستقبل میں اس نیٹ ورک کو کراچی سمیت شمالی امریکا اور مشرق وسطیٰ کے مختلف شہروں تک پھیلانے کا منصوبہ ہے۔
View this post on Instagram
ایپ کا نمایاں فیچر ولی نظام قرار دیا جارہا ہے، جس کے ذریعے والدین یا سرپرست 2 صارفین کے درمیان ہونے والی گفتگو کی نگرانی کرسکتے ہیں۔ اس نظام میں 2 طریقے شامل ہیں، ایک میں پیغامات کو براہِ راست دیکھا جاسکتا ہے جبکہ دوسرے میں مصنوعی ذہانت پر مبنی نظام نامناسب الفاظ کی نشاندہی کر کے والدین کو آگاہ کرتا ہے۔
اداکار کے مطابق ایپ میں تفصیلی کوائف نظام بھی شامل ہے جہاں زمینی سطح پر موجود نمائندے صارفین کی فراہم کردہ معلومات کی جانچ اور تصدیق کرتے ہیں۔ اس کے علاوہ ماہرِ نفسیات اور معالجین کی خدمات بھی فراہم کی جارہی ہیں تاکہ رشتہ طے ہونے سے پہلے، دوران اور بعد میں پیش آنے والے مسائل میں رہنمائی دی جاسکے۔
یہ بھی پڑھیں: آن لائن رشتہ ایپس پر ہراسانی کے خطرات کیوں بڑھتے جارہے ہیں؟
حمزہ علی عباسی نے اس ایپ کو شادی سے متعلق مسائل کا مکمل حل قرار دیا ہے۔ یہ ایپ موبائل ایپلی کیشن اسٹورز پر دستیاب بتائی جارہی ہے۔
تاہم مبصرین کا کہنا ہے کہ یہ دیکھنا باقی ہے کہ یہ پیغام رسانی کا نظام روایتی خاندانی ملاقاتوں سے کس حد تک مختلف ثابت ہوتا ہے، جہاں لڑکے اور لڑکی کو خاندان کی موجودگی میں ایک دوسرے سے تعارف کا موقع دیا جاتا ہے۔
