اسپیکر قومی اسمبلی سردار ایاز صادق نے کہا ہے کہ قومی وسائل کا دانشمندانہ استعمال یقینی بنایا جائے گا اور کفایت شعاری مہم کے ذریعے قومی خزانے پر بوجھ کم کیا جائے گا۔
قومی اسمبلی سیکرٹریٹ کے مطابق اسپیکر قومی اسمبلی سردار ایاز صادق سے وفاقی وزیر خزانہ محمد اورنگزیب اور وفاقی وزیر پارلیمانی امور ڈاکٹر طارق فضل چوہدری نے ملاقات کی، جس میں وزیر اعظم میاں شہباز شریف کی ہدایت پر جاری کفایت شعاری پالیسی اور مالی سال 2026-27 کے بجٹ پر تفصیلی تبادلہ خیال کیا گیا۔
یہ بھی پڑھیں: پارلیمنٹ میں کفایت شعاری کے سخت اقدامات، 70 فیصد گاڑیاں بند رکھنے کا فیصلہ
ملاقات کے دوران وفاقی وزیر خزانہ محمد اورنگزیب نے قومی اسمبلی سیکرٹریٹ میں کیے گئے کفایت شعاری اقدامات کو سراہتے ہوئے انہیں حکومتی اخراجات میں کمی کی بہترین مثال قرار دیا۔
اسپیکر قومی اسمبلی نے کہا کہ کفایت شعاری مہم کے تحت ہونے والی بچت سے قومی خزانے پر دباؤ کم ہوگا اور عوامی نمائندوں کی جانب سے تنخواہوں میں رضاکارانہ کٹوتی پوری قوم کے لیے مثال ہے۔ انہوں نے کہا کہ اس مہم کو دیگر اداروں تک پھیلانے سے مزید مالی بچت ممکن ہے۔
یہ بھی پڑھیں: مذاکرات کے دروازے کھلے ہیں، ایاز صادق کا اپوزیشن کو پیغام
ڈاکٹر طارق فضل چوہدری نے بھی کفایت شعاری اقدامات کی تعریف کرتے ہوئے کہا کہ موجودہ علاقائی صورتحال کے پیش نظر ہر شہری کو اس مہم میں اپنا کردار ادا کرنا ہوگا۔
اسپیکر قومی اسمبلی نے آئندہ مالی سال کے بجٹ اجلاس کے انعقاد کے لیے وزارت خزانہ سے قریبی رابطے اور مکمل تعاون جاری رکھنے پر زور دیا۔
