گلاب اور خوشبودار پودوں کے عالمی فورم کا دوسرا ایڈیشن 29 مارچ سے 11 اپریل تک طائف میں منعقد ہوگا، جو گورنر شہزادہ فواز بن سلطان کی سرپرستی میں ہوگا۔
فورم کا مقصد طائف کو گلاب اور خوشبودار پودوں کی پیداوار کے ایک اہم عالمی مرکز کے طور پر مزید مستحکم کرنا اور اس شعبے سے متعلق معاشی و سرمایہ کاری مواقع کو فروغ دینا ہے۔
مزید پڑھیں: طائف عربی گھوڑوں کے ورثے کا مرکز بن گیا
فورم کی ترجمان خدیجہ ابو النجا کے مطابق یہ ایونٹ ایک جامع پلیٹ فارم فراہم کرتا ہے، جہاں سائنسی، معاشی اور سیاحتی پہلوؤں کو یکجا کیا جاتا ہے، جبکہ طائف کی اس شعبے میں منفرد صلاحیتوں کو بھی اجاگر کیا جاتا ہے۔
یہ فورم گزشتہ سال کے کامیاب ایڈیشن کی رفتار کو آگے بڑھا رہا ہے، جس میں صرف 10 دن کے دوران 3 لاکھ 50 ہزار سے زائد افراد نے شرکت کی تھی۔ اس سے طائف کی ’شہرِ گلاب‘ کے طور پر بڑھتی ہوئی مقبولیت اور ایک منفرد سیاحتی مقام کے طور پر اس کی حیثیت مزید مستحکم ہوئی، جو وژن 2030 کے اہداف سے ہم آہنگ ہے۔
مزید پڑھیں:سعودی عرب میں سردی کا 17 سالہ ریکارڈ ٹوٹ گیا
یہ ایونٹ سعودی عرب میں گلاب اور خوشبودار پودوں کی صنعت کے فروغ کی جاری کوششوں کی عکاسی بھی کرتا ہے۔ پائیدار زرعی دیہی ترقی پروگرام (سعودی ریف)، جو اس شعبے کا ایک اہم معاون ہے، گزشتہ 4 برس میں گلاب کی پیداوار میں 34 فیصد اضافہ کرنے میں مدد دے چکا ہے، جس کے بعد سالانہ پیداوار 96 کروڑ گلاب تک پہنچ گئی ہے۔
یہ پروگرام 400 سے زائد کسانوں کی معاونت کر رہا ہے اور اس کا ہدف 2026 تک سالانہ پیداوار کو 2 ارب گلاب تک بڑھانا ہے، جس سے سعودی عرب کی علاقائی اور عالمی منڈیوں میں پوزیشن مزید مضبوط ہوگی۔
