سعودی عرب کی معروف توانائی کمپنی آرامکو نے پاکستان میں اپنے پیٹرول پمپس پر ہائی اوکٹین پیٹرول کی قیمت میں نمایاں کمی کرتے ہوئے صارفین کو بڑا ریلیف دے دیا ہے۔ کمپنی نے ہائی اوکٹین کی قیمت 610 روپے فی لیٹر سے کم کرکے 410 روپے فی لیٹر مقرر کر دی ہے، جس کے بعد ملک بھر میں اس فیصلے پر عوامی حلقوں میں مثبت ردعمل دیکھنے میں آ رہا ہے۔
یہ بھی پڑھیں:ہماری گاڑیوں کو ہائی اوکٹین فیول کی ضرورت نہیں، کیا موٹرز پاکستان
یہ پیشرفت ایک ایسے وقت میں سامنے آئی ہے جب حال ہی میں حکومت پاکستان نے پیٹرولیم مصنوعات کی قیمتوں میں عمومی اضافہ نہیں کیا تھا، تاہم ہائی اوکٹین پیٹرول پر عائد لیوی میں نمایاں اضافہ کرتے ہوئے اسے 100 روپے سے بڑھا کر 300 روپے فی لیٹر کر دیا گیا تھا۔
اس فیصلے کے بعد مختلف پیٹرول پمپس پر ہائی اوکٹین کی قیمت 600 سے 610 روپے فی لیٹر تک پہنچ گئی تھی، جبکہ پاکستان اسٹیٹ آئل کے پمپس پر یہ قیمت تقریباً 589 روپے فی لیٹر ریکارڈ کی گئی تھی۔
ہائی اوکٹین پیٹرول خاص طور پر جدید ٹربو انجن اور ہائی کمپریشن انجن والی گاڑیوں کے لیے ناگزیر ہوتا ہے۔ پاکستان میں درآمد یا مقامی طور پر اسمبل ہونے والی کئی نئی گاڑیاں ایسی ہیں جو صرف ہائی اوکٹین پر بہتر کارکردگی دیتی ہیں، جس کے باعث اس کی طلب میں مسلسل اضافہ ہو رہا تھا۔
یہ بھی پڑھیں:پیٹرول بحران: ایپ بیسڈ کوٹہ اور واؤچر سسٹم کے تحت کس کو کتنا پیٹرول ملے گا؟
مارکیٹ ذرائع کے مطابق اس اقدام سے نہ صرف صارفین کو مالی ریلیف ملے گا بلکہ ہائی اوکٹین کے استعمال میں بھی اضافہ متوقع ہے۔
