بنگلہ دیش کے ضلع ٹانگائل میں ٹرین کی زد میں آکر ایک بچے سمیت 5 افراد جاں بحق ہوگئے، پولیس نے واقعے کی تصدیق کردی۔
پولیس کے مطابق حادثہ جمعے کی شام کلیہاتی اپازیلا کے علاقے ڈھالادینگور میں پیش آیا۔ جمنا برج ایسٹ پولیس اسٹیشن کے افسر سبوجل حسین نے بتایا کہ متاثرہ افراد ڈھاکا جانے والی ایک بس کے مسافر تھے۔
یہ بھی پڑھیں: بنگلہ دیش: ٹرین اور بس میں تصادم، 12 افراد جاں بحق
ابتدائی معلومات کے مطابق بس جمنا برج ہائی وے پر ایندھن ختم ہونے کے باعث رک گئی، جس کے بعد چند مسافر گاڑی سے اتر کر سڑک کے قریب ریلوے ٹریک کے پاس انتظار کرنے لگے۔
اسی دوران سراج گنج ایکسپریس ٹرین وہاں سے گزری اور ٹریک کے قریب موجود افراد کو کچل دیا، جس کے نتیجے میں ایک بچہ، 2 خواتین اور 2 مرد موقع پر ہی جاں بحق ہوگئے۔
یہ بھی پڑھیں: ڈھاکا، مسافر ٹرین کی 9 بوگیاں پٹری سے اتر گئیں، 100 سے زائد مسافر زخمی
پولیس کا کہنا ہے کہ جاں بحق ہونے والے افراد بظاہر ایک ہی خاندان کے افراد معلوم ہوتے ہیں، تاہم فوری طور پر ان کی شناخت ممکن نہیں ہوسکی۔
اطلاع ملنے پر جمنا برج ایسٹ پولیس اور ریلوے حکام موقع پر پہنچ گئے اور لاشوں کو ریلوے لائن کے قریب سے تحویل میں لے لیا گیا۔ واقعے کی مزید تحقیقات جاری ہیں
