کوئٹہ میں گیس پائپ لائن دھماکے کے بعد مرمت کا کام سیکیورٹی کلیئرنس نہ ملنے کے باعث شروع نہ ہو سکا، جس سے متعدد اضلاع میں گیس کی فراہمی معطل ہے اور بحالی میں مزید تاخیر کا خدشہ ظاہر کیا جا رہا ہے۔
کوئٹہ کے مغربی بائی پاس کلی خلی کے قریب تباہ ہونے والی گیس پائپ لائن کی مرمت تاحال شروع نہ ہو سکی، جس کے باعث شہر سمیت متعدد اضلاع میں گیس کی فراہمی معطل ہے اور شہری شدید مشکلات کا سامنا کر رہے ہیں۔
یہ بھی پڑھیے کوئٹہ: شرپسنوں نے بم سے گیس پائپ لائن اڑادی، متعدد علاقے گیس سے محروم
سوئی سدرن گیس کمپنی (ایس ایس جی سی) حکام کے مطابق گزشتہ روز متاثر ہونے والی 18 انچ قطر کی گیس پائپ لائن اور اسمبلی والو کی مرمت کے لیے سیکیورٹی کلیئرنس درکار ہے، جس کے بغیر کام کا آغاز ممکن نہیں۔
حکام کا کہنا ہے کہ مرمت کے لیے درکار مخصوص پائپ کراچی سے منگوایا جائے گا، جس کے باعث بحالی کے عمل میں مزید تاخیر متوقع ہے۔
گیس کی فراہمی معطل ہونے سے مستونگ، قلات، پشین، کچلاک اور زیارت سمیت کوئٹہ کے مختلف علاقے ہزارہ ٹاؤن، ہزارگنجی، خروٹ آباد، پشتون باغ، خیزی اور نوحصار متاثر ہوئے ہیں۔
یہ بھی پڑھیے کوئٹہ میں گیس پائپ لائن دھماکے سے متاثر، متعدد علاقوں کو گیس فراہمی معطل
ایس ایس جی سی کے مطابق گیس پائپ لائن کی مکمل بحالی میں مزید دو سے تین روز لگ سکتے ہیں، جس کے بعد مرحلہ وار گیس سپلائی بحال کی جائے گی۔
