پاکستان سپر لیگ (پی ایس ایل) کے گیارہویں ایڈیشن کے دوران بال ٹیمپرنگ کے واقعے پر پاکستان کرکٹ بورڈ (پی سی بی) نے قومی کرکٹر فخر زمان کے خلاف کارروائی کرتے ہوئے ان پر 2 میچز کے لیے پابندی لگا دی ہے۔
پی سی بی کی جانب سے جاری کردہ اعلامیے کے مطابق فخر زمان کو ضابطہ اخلاق کی شق 2.14 کی خلاف ورزی کا مرتکب پایا گیا جو کہ لیول تھری جرم کے زمرے میں آتی ہے۔ اس خلاف ورزی کے نتیجے میں ان پر 2 میچز کی پابندی عائد کی گئی ہے۔
یہ بھی پڑھیں: بال ٹیمپرنگ کا ڈرامہ براڈکاسٹرز نے کیا، سابق کپتان راشد لطیف کے اہم دعوے
پی سی بی کا کہنا ہے کہ فخر زمان لیول 3 کے قصور وار قرار پائے گئے، فیصلے کے خلاف 48 گھنٹوں میں اپیل کی جا سکتی ہے۔
واضح رہے کہ پاکستان سپر لیگ (پی ایس ایل) 11 میں لاہور قلندرز اور کراچی کنگز کے درمیان کھیلے گئے میچ میں مبینہ بال ٹیمپرنگ کا معاملہ سامنے آ گیا جس نے شائقین کرکٹ اور سوشل میڈیا صارفین کی توجہ حاصل کر لی۔
بال سے چھیڑ چھاڑ کی ویڈیو سوشل میڈیا پر بھی وائرل ہوئی جس میں دیکھا جا سکتا ہے کہ لاہور قلندرز کے کپتان شاہین شاہ آفریدی، حارث رؤف اور فخر زمان کھڑے ہیں۔ فخر زمان حارث رؤف سے گیند لیتے ہیں اور کچھ ’چھیڑ چھاڑ‘ کے بعد گیند واپس انہیں کو تھما دیتے ہیں۔ لیکن اسی وقت امپائر حارث روف سے یہ گیند لے کر اسے تبدیل کر دیتے ہیں اور لاہور قلندرز پر 5 رنز کی پنلٹی لگا دیتے ہیں۔
