وفاقی دارالحکومت اسلام آباد میں پولیس نے مختلف کارروائیوں کے دوران بین الصوبائی ڈکیت گینگز کے خلاف بڑی کامیابی حاصل کر لی۔ تھانہ ترنول اور تھانہ سبزی منڈی کی حدود میں پیش آنے والے دو الگ واقعات میں ملزمان نے پولیس پر فائرنگ کی، تاہم پولیس کی بروقت کارروائی سے چار ملزمان گرفتار کر لیے گئے، جن میں سے 3 زخمی حالت میں ہیں۔
یہ بھی پڑھیں:اسلام آباد پولیس کی کارروائیاں، جرائم پیشہ عناصر اور غیر قانونی مقیم افراد کے گرد گھیرا تنگ
ترجمان اسلام آباد پولیس کے مطابق تھانہ ترنول کے علاقے میں پولیس معمول کی چیکنگ میں مصروف تھی کہ 2 موٹر سائیکلوں پر سوار 4 مشکوک مسلح افراد کو رکنے کا اشارہ کیا گیا۔ ملزمان نے رکنے کے بجائے فائرنگ شروع کر دی، جس کے جواب میں پولیس نے حفاظتی اقدامات کے تحت کارروائی کی۔
دوسری جانب تھانہ سبزی منڈی کے علاقے میں جرائم پیشہ عناصر کی موجودگی کی اطلاع پر پولیس نے چھاپہ مارا، جہاں ملزمان نے پولیس ٹیم کو دیکھتے ہی اندھا دھند فائرنگ شروع کر دی۔ پولیس اہلکار بلٹ پروف جیکٹس کی بدولت محفوظ رہے، جبکہ ملزمان فرار ہونے کی کوشش میں اپنی ہی فائرنگ سے زخمی ہو گئے۔
پولیس نے 3 زخمی ڈاکوؤں کو گرفتار کر لیا جبکہ ایک ملزم کو فرار کی کوشش کے دوران دھر لیا گیا۔ گرفتار ملزمان اسلام آباد اور پنجاب میں ڈکیتی، راہزنی اور دیگر سنگین جرائم کے متعدد مقدمات میں مطلوب اور سابقہ ریکارڈ یافتہ ہیں۔
ملزمان نے ابتدائی تفتیش میں عیدالفطر کے دنوں میں تھانہ ترنول کے علاقے میں اسلحہ کے زور پر شہریوں کو لوٹنے کی متعدد وارداتوں کا بھی اعتراف کیا ہے۔
پولیس نے ملزمان کے قبضے سے چار پستول بمعہ ایمونیشن اور چھینا گیا موٹر سائیکل بھی برآمد کر لیا ہے، جبکہ فرار ہونے والے ساتھیوں کی گرفتاری کے لیے سرچ آپریشن جاری ہے۔
