پاکستان کے مختلف علاقوں میں طوفانی بارشوں کا سلسلہ جاری ہے جس کے نتیجے میں کئی مقامات پر سیلابی صورتحال پیدا ہو گئی ہے۔ وسطی اور شمالی علاقوں میں اولے اور برفباری کے ساتھ شدید سردی رہی، جبکہ بعض علاقوں میں جان و مال کے نقصان کی اطلاعات بھی موصول ہوئی ہیں۔
یہ بھی پڑھیں:ملک کے مختلف علاقوں میں بارش اور پہاڑی علاقوں میں برفباری کا امکان
پاکستان کے شمالی اور وسطی علاقوں میں اسلام آباد میں بارش اور اولے پڑنے سے موسم شدید سرد ہو گیا۔ لاہور، راولپنڈی، مری، سرگودھا، گجرات، سیالکوٹ اور گوجرانوالہ میں بھی تیز بارش ریکارڈ کی گئی۔
میانوالی میں کنڈل چھرا والا کے مقام پر دریائے کرم میں طغیانی کے باعث سیلابی صورتحال پیدا ہو گئی، جس کے نتیجے میں پانی گھروں میں داخل ہو گیا۔
میڈیا رپورٹ کے مطابق خیبرپختونخوا کے مختلف اضلاع میں بارش ہوئی اور پارا چنار میں دریائے کرم کے کنارے واقع پل سے ملحقہ سڑک پانی میں بہہ گئی۔ مکان کی چھت اور آسمانی بجلی گرنے سے دو افراد جاں بحق ہو گئے۔
خیبر میں پاک افغان شاہراہ پر گاڑی سیلابی ریلے میں بہہ گئی، جس کے نتیجے میں ۳ افراد ہلاک ہوئے۔ آزاد کشمیر میں بھی بارش کا سلسلہ جاری رہا۔
یہ بھی پڑھیں:مزید بارشیں اور برفباری، این ڈی ایم اے نے الرٹ جاری کردیا
بلوچستان کے شمالی اضلاع میں بارش اور بالائی علاقوں میں ہلکی برف باری سے موسم مزید سرد ہو گیا اور مختلف حادثات میں پانچ افراد جاں بحق ہوئے۔
کراچی میں ایک بار پھر بادلوں کے برسنے کا امکان ہے۔ ماہرین کے مطابق خیبرپختونخوا میں 6 سے 9 اپریل تک بارشوں کا نیا سلسلہ شروع ہونے کا امکان ہے، جس سے کئی علاقوں میں سیلابی خطرہ برقرار رہے گا۔
