لاہور میں چلڈرن اسپتال کی پارکنگ سے ڈاکٹر کی لاش برآمد ہوئی ہے، جسے تحویل میں لے لیا گیا ہے، اور پولیس نے تفتیش شروع کردی ہے۔
رپورٹ کے مطابق نصیر آباد پولیس نے فرانزک ماہرین کی مدد سے جائے وقوعہ سے شواہد اکٹھے کر لیے۔
ترجمان پولیس کے مطابق ایس پی ماڈل ٹاؤن جہانداد اکرم نفری کے ہمراہ موقع پر پہنچے اور شواہد اکٹھے کیے۔
ایس پی ماڈل ٹاؤن کے مطابق مقتول کی شناخت ڈاکٹر احمد لطیف کے نام سے ہوئی ہے جو 5 روز قبل لاپتا ہوا تھا۔
پولیس نے بتایا کہ متوفی کینال ویو پارک سوسائٹی کا رہائشی تھا اور چلڈرن اسپتال میں ڈیوٹی کرتا تھا۔ لاش کو پوسٹ مارٹم کے لیے مردہ خانے منتقل کردیا گیا ہے۔
نصیر آباد پولیس نے واقعہ کی مزید تفتیش شروع کر دی ہے، اور کہا ہے کہ حقائق سامنے لائے جائیں گے۔
ایس پی ماڈل ٹاؤن جہانداد اکرم کا کہنا ہے کہ واقعہ کی وجوہات اور محرکات کا تعین مزید تحقیقات سے کیا جائے گا۔
