حکومت نے پیٹرولیم مصنوعات کی قیمتوں میں حالیہ اضافے کے حوالے سے اپنے اتحادیوں کو اعتماد میں لے لیا ہے اور یقین دہانی کرائی ہے کہ حالات بہتر ہوتے ہی قیمتوں میں کمی کی جائے گی۔
حکمران اتحاد کی مشترکہ پارلیمانی پارٹی کا اجلاس وزیر دفاع خواجہ آصف کی زیر صدارت منعقد ہوا، جس میں وزیر منصوبہ بندی احسن اقبال، ریاض پیرزادہ، بیرسٹر عقیل ملک، وزیر خزانہ محمد اورنگزیب، وزیر پیٹرولیم علی پرویز ملک اور وزیر پارلیمانی امور ڈاکٹر طارق فضل چوہدری سمیت دیگر رہنماؤں نے شرکت کی۔
اجلاس کے دوران وزیر مملکت برائے پیٹرولیم علی پرویز ملک نے شرکا کو موجودہ صورتحال پر بریفنگ دیتے ہوئے بتایا کہ پیٹرولیم مصنوعات کی بلا تعطل فراہمی یقینی بنانے کے لیے فوری اقدامات کیے گئے ہیں۔
اجلاس کے بعد وزیر پارلیمانی امور طارق فضل چوہدری نے بتایا کہ مسلم لیگ (ن)، پیپلز پارٹی، ایم کیو ایم اور دیگر اتحادی جماعتوں کے رہنماؤں نے شرکت کی، جہاں وزیر خزانہ اور وزیر پیٹرولیم نے موجودہ صورتحال سے آگاہ کیا۔
انہوں نے کہاکہ اتحادی جماعتوں نے حکومت کی پالیسیوں پر اعتماد کا اظہار کیا اور پیٹرولیم قیمتوں سے متعلق مزید اقدامات پر غور کیا گیا، جبکہ وزرا نے یقین دلایا کہ حالات معمول پر آتے ہی پیٹرولیم مصنوعات کی قیمتوں میں کمی کر دی جائے گی۔
