نیدرلینڈز میں گزشتہ سال میوزیم سے چوری ہونے والا 2 ہزار 500 سال قدیم سونے کا نایاب ہیلمٹ برآمد کر لیا گیا ہے۔
غیر ملکی خبر رساں ادارے ‘ایسوسی ایٹڈ پریس’ کے مطابق حکام نے مشرقی ڈچ شہر اسن میں پریس کانفرنس کے دوران رومانیا کے تاریخی ورثے سے تعلق رکھنے والا ‘کوٹوفینیستی’ ہیلمٹ میڈیا کے سامنے پیش کیا۔ یہ ہیلمٹ قدیم ڈیشیا تہذیب سے منسوب ایک قیمتی قومی خزانہ تصور کیا جاتا ہے۔
یہ بھی پڑھیے: برطانیہ کے میوزیم سے 600 قیمتی نوادرات چوری، ہندوستانی تاریخی اشیا بھی شامل
استغاثہ کی نمائندہ کورین فاہنر نے بتایا کہ ‘ہم اس کامیابی پر بے حد خوش ہیں، یہ ایک مشکل اور طویل مرحلہ تھا، خاص طور پر رومانیا کے لیے’۔
یہ ہیلمٹ جنوری 2025 میں ڈرینٹس میوزیم میں نمائش کے دوران چوری کیا گیا تھا، جہاں نامعلوم چور اسے 3 سونے کے کنگنوں سمیت لے گئے تھے۔ حکام کو خدشہ تھا کہ اپنی منفرد ساخت اور شہرت کے باعث اسے فروخت کرنا مشکل ہونے کی وجہ سے ممکنہ طور پر پگھلا دیا جائے گا۔
پولیس نے واقعے کے کچھ ہی عرصے بعد 3 مشتبہ افراد کو گرفتار کیا تھا، جن کے ساتھ معاہدے کے نتیجے میں دو کنگن بھی برآمد کر لیے گئے ہیں، جبکہ تیسرے کنگن کی تلاش جاری ہے۔ ملزمان کے خلاف مقدمے کی سماعت اپریل کے آخر میں شروع ہوگی۔
یہ بھی پڑھیے: لوور میوزیم میں پانی کا رساؤ: مصری نوادرات کی سینکڑوں نایاب کتابیں متاثر
میوزیم کے ڈائریکٹر رابرٹ وان لانگھ کے مطابق ‘ہیلمٹ کو معمولی نقصان پہنچا ہے اور اس پر ہلکی سی ڈینٹ آئی ہے، تاہم اسے مستقل نقصان نہیں پہنچا، جبکہ کنگن بالکل محفوظ حالت میں ہیں’۔
تحقیقات کے مطابق چوروں نے میوزیم میں داخل ہونے کے لیے دیسی ساختہ دھماکا خیز مواد اور ہتھوڑے کا استعمال کیا، جبکہ سیکیورٹی فوٹیج میں 3 افراد کو دروازہ توڑتے اور دھماکا کرتے دیکھا گیا تھا۔
