معروف اداکارہ ماورا حسین نے حال ہی میں اداکاری اور جذباتی مناظر میں رونے کے فن پر کھل کر بات کی ہے۔ ماورا نے بتایا کہ کس طرح دل سے محسوس کیے گئے جذبات اور خلوص ناظرین تک پہنچتے ہیں۔
نجی ٹی وی کے پروگرام میں ماورا حسین اور ان کی بہن عروہ حسین نے اپنی اداکاری، خاندانی تعلقات اور جذباتی مناظر کے پیچھے چھپی کہانی بیان کیں جس پر میزبان ندا یاسر بھی دنگ رہ گئیں۔
View this post on Instagram
ندا یاسر نے کہا کہ ماورا اپنی اداکاری، خوبصورتی، مہربانی اور خاص طور پر اسکرین پر رونے کی وجہ سے پہچانی گئیں۔ ماورا نے مسکرا کر شکریہ ادا کیا تو میزبان نے سوال کیا، کیا یہ سچ ہے کہ روتے ہوئے ماورا جتنی خوبصورت کوئی نہیں لگتی؟
عروہ حسین نے جواب دیا کہ بات صرف خوبصورت لگنے کی نہیں بلکہ ماورا جذبات کو اتنی شدت سے محسوس کرتی ہیں کہ ناظرین بھی ان کے ساتھ جڑ جاتے ہیں۔ جب عروہ سے پوچھا گیا کہ کیا ماورا بچپن سے ہی ایسے خوبصورت انداز میں روتی تھیں، تو انہوں نے ہنستے ہوئے کہا کہ ماورا جب روتی تھیں تو انہیں فوراً ہر چیز مل جاتی تھی۔ وہ بہت پیاری بچی تھیں اور جب اتنی خوبصورت بچی روئے تو ہم اور امی فوراً مان جاتے تھے۔ ان کے گالوں پر آنسو بہت دلکش لگتے تھے۔
یہ بھی پڑھیں: اداکارہ ماورا حسین 3 بھارتی فلمیں چھوڑنے پر کیوں مجبور ہوئیں؟
ندا یاسر نے پوچھا کہ کیا ماورا کو اس خوبصورت انداز میں رونے کی تربیت دی گئی تھی؟ اس پر عروہ نے کہا کہ مقصد خوبصورت لگنا نہیں بلکہ سچے جذبات کا اظہار ہے جو خودبخود اسکرین پر جھلک جاتا ہے۔
عروہ نے بتایا کہ جب انہیں کسی منظر کے لیے مدد چاہیے ہوتی ہے تو وہ سب سے پہلے ماورا کو فون کرتی ہیں، پھر اپنے شوہر فرحان سعید کو۔ ان کا کہنا تھا کہ میں خود کو خوش قسمت سمجھتی ہوں کہ یہ دونوں فوراً فون اٹھا لیتے ہیں۔
یہ بھی پڑھیں: ’آپ کمال ہو‘، بالی ووڈ اداکارہ ودیا بالن نے ماورا حسین کی تعریف کیوں کی؟
جب ماورا سے ان کے ’رونے کے راز‘ کے بارے میں پوچھا گیا تو انہوں نے کہا میں بس ایمانداری سے وہی کرنے کی کوشش کرتی ہوں جو ہدایتکار چاہتے ہیں۔ جب آپ دل سے کچھ کرتے ہیں تو اس کا اثر ہوتا ہے۔ انہوں نے مزید کہا کہ ہر پرفارمنس میں تھوڑا سا ’جادو‘ ہوتا ہے اور وہ ہر سین سے پہلے دعا کرتی ہیں۔
ان کا مزید کہنا تھا کہ کبھی آپ کسی اداس چیز کے بارے میں سوچتے ہیں اور اگر ایسا تجربہ نہ ہو تو خود ہی ذہن میں بنا لیتے ہیں۔ میں اپنے جذبات سے التجا کرتی ہوں کہ وہ صحیح طرح سامنے آئیں۔ ندا یاسر نے ماورا کی آواز کی بھی تعریف کی اور کہا کہ کوئی بھی اداکار آنسو بہا سکتا ہے، مگر تمہاری آواز کی کپکپاہٹ دل تک پہنچتی ہے۔ اس پر ماورا نے کہا کہ وہ جان بوجھ کر ایسا نہیں کرتیں بس دعا کرتی ہیں کہ یہ اثر قائم رہے۔
