وفاقی حکومت نے ملک میں ترقیاتی منصوبوں کے نئے مرحلے کا آغاز کرتے ہوئے 280 ارب روپے سے زائد مالیت کے اہم منصوبوں کی منظوری دے دی ہے۔
ان منصوبوں کا مقصد انفرا اسٹرکچر کی بہتری، عوامی سہولیات میں اضافہ اور معاشی ترقی کو فروغ دینا ہے۔
یہ بھی پڑھیں: گلگت بلتستان میں 100 میگاواٹ سولر پاور منصوبے کی منظوری، وزیراعظم کی 3 سال میں تکمیل کی ہدایت
ڈپٹی وزیراعظم و وزیر خارجہ اسحاق ڈار کی زیر صدارت ایگزیکٹو کمیٹی برائے قومی اقتصادی کونسل (ایکنک) کا اجلاس اسلام آباد میں منعقد ہوا، جس میں ملک کی اہم ترقیاتی ترجیحات کا جائزہ لیا گیا۔
اجلاس کے دوران ایکنک نے 280 ارب روپے سے زائد لاگت کے بڑے منصوبوں کی منظوری دی، جن میں شاہراہوں کی تعمیر، صحت کے شعبے کی بہتری اور شہری ترقی کے منصوبے شامل ہیں۔
ان منصوبوں کا مقصد ملک میں رابطوں کو مضبوط بنانا، عوامی خدمات کو وسعت دینا اور اقتصادی ترقی کو سہارا فراہم کرنا ہے۔
مزید پڑھیں: وزیرِ اعظم شہباز شریف کا گلگت بلتستان میں 100 میگاواٹ سولر منصوبہ ایک سال میں مکمل کرنے کی ہدایت
اجلاس سے خطاب کرتے ہوئے اسحاق ڈار نے اس بات پر زور دیا کہ حکومت پائیدار ترقی، مؤثر خدمات کی فراہمی اور طویل المدتی معاشی استحکام پر توجہ مرکوز کیے ہوئے ہے۔
اجلاس میں وفاقی وزیر خزانہ و ریونیو، وزیر منصوبہ بندی، ترقی و خصوصی اقدامات، وزیر قومی صحت خدمات و ضوابط، خیبرپختونخوا کے مشیر خزانہ سمیت متعلقہ وزارتوں اور محکموں کے اعلیٰ حکام نے شرکت کی۔
