امریکا کی خاتونِ اول میلانیا ٹرمپ نے جیفری ایپسٹین سے متعلق خود پر لگنے والے الزامات کو سختی سے مسترد کرتے ہوئے انہیں ’جھوٹ‘ قرار دیا ہے۔ انہوں نے ایک غیر متوقع بیان میں کہا کہ ان کا ایپسٹین کے جرائم یا کسی بھی قسم کی بدسلوکی سے کوئی تعلق نہیں۔
یہ بھی پڑھیں:ایپسٹین فائلز: بینک آف امریکا متاثرہ خواتین کیس میں تصفیے پر مجبور
وائٹ ہاؤس میں میڈیا سے گفتگو کرتے ہوئے میلانیا ٹرمپ نے کہا کہ ان کے بارے میں پھیلائی جانے والی غلط معلومات فوری طور پر بند ہونی چاہییں۔ ان کا کہنا تھا کہ سوشل میڈیا پر برسوں سے ان سے متعلق جعلی تصاویر اور بیانات گردش کر رہے ہیں، جن پر یقین کرنے سے گریز کیا جائے۔
میلانیا ٹرمپ نے واضح کیا کہ وہ نہ تو ایپسٹین کی متاثرہ تھیں اور نہ ہی انہوں نے ان کا تعارف ڈونلڈ ٹرمپ سے کروایا۔ انہوں نے کہا کہ وہ اپنے شوہر سے ایپسٹین سے ملاقات سے 2 سال قبل ہی مل چکی تھیں۔
انہوں نے مزید کہا کہ انہیں ایپسٹین کی جانب سے متاثرین کے ساتھ ہونے والی زیادتیوں کا کبھی علم نہیں رہا اور نہ ہی وہ کسی طور اس میں شامل رہیں۔ خاتون اول نے امریکی کانگریس سے مطالبہ کیا کہ ایپسٹین کے متاثرین کو کھلے عام گواہی دینے کا موقع فراہم کیا جائے تاکہ حقیقت سامنے آ سکے۔
واضح رہے کہ جیفری ایپسٹین 2019 میں کم عمر لڑکیوں کی اسمگلنگ کے مقدمے کے دوران وفاقی تحویل میں ہلاک ہو گیا تھا، تاہم یہ اسکینڈل اب بھی امریکی سیاست میں موضوعِ بحث بنا ہوا ہے۔
