پی ایس ایل 11 کے 18ویں میچ میں کوئٹہ گلیڈی ایٹرز نے راولپنڈیز کو 61 رنز سے شکست دے دی ہے۔
کراچی کے نیشنل بینک اسٹیڈیم میں کھیلے گئے میچ میں راولپنڈیز نے ٹاس جیت کر کوئٹہ گلیڈی ایٹرز کے خلاف پہلے فیلڈنگ کرنے کا فیصلہ کیا، کوئٹہ گلیڈی ایٹرز نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 182 رنز بنائے۔
یہ بھی پڑھیں: پی ایس ایل 11، پشاور زلمی نے کراچی کنگز کو 159رنز سے شکست دے دی
کوئٹہ کی جانب سے سعود شکیل نے 42 رنز کی اننگز کھیلی جبکہ رائلی روسو نے 53 رنز بنا کر نمایاں کارکردگی دکھائی۔ حسن نواز نے جارحانہ کھیل پیش کرتے ہوئے 39 رنز صرف 16 گیندوں پر اسکور کیے۔ آخری اوورز میں جہانداد خان نے بھی تیز رفتار 21 رنز بنا کر ٹیم کا مجموعہ بہتر کیا۔
راولپنڈی کی جانب سے بولنگ میں بین سیئرز سب سے کامیاب بولر رہے جنہوں نے 3 وکٹیں حاصل کیں۔ محمد عامر نے 2 کھلاڑیوں کو آؤٹ کیا۔
کوئٹہ گلیڈی ایٹرز کی جانب سے دیے گئے 183 رنز کے تعاقب میں راولپنڈیز کی ٹیم 17.3 اوورز میں 121 رنز پر ڈھیر ہوگئی۔
یہ بھی پڑھیں: پی ایس ایل 11: ملتان سلطانز نے راولپنڈیز کو 7 وکٹوں سے شکست دیدی
سعد مسعود 31 رنز بنا کر آؤٹ ہوئے، ڈیرل مچل 30 اور یاسر خان 22 رنز بناسکے، کپتان محمد رضوان بغیر کوئی رن بنائے آؤٹ ہوئے، عثمان خواجہ 7 رنز بناسکے۔
کوئٹہ گلیڈی ایٹرز کی جانب سے عثمان طارق، سعود شکیل اور جہانداد خان نے 2، 2 وکٹیں حاصل کیں۔
