سوئیڈن کے مایہ ناز کھلاڑی بیورن بورگ اگلے ماہ پاکستان کا دورہ کریں گے۔
بیورن بورگ اسلام آباد میں آئی ٹی ایف فیوچر سیریز کے موقع پر پاکستان آئیں گے اور ایک ہفتے کے دورے پر 4 مئی کو اسلام آباد پہنچیں گے۔
یہ بھی پڑھیں: پاکستانی ٹینس کھلاڑی طلحہ وحید نے گنیز ورلڈ ریکارڈ قائم کر لیا
ان کے بیٹے لیو بورگ بھی اسلام آباد میں ہونے والے ٹورنامنٹ میں شرکت کریں گے، جبکہ امکان ہے کہ بیورن بورگ اپنے دورے کے دوران اعصام الحق قریشی کے ساتھ نمائشی میچ بھی کھیلیں۔
یاد رہے کہ بیورن بورگ نے 6 مرتبہ فرنچ اوپن اور 5 مرتبہ ومبلڈن کا ٹائٹل جیتا، جبکہ اپنے کیریئر میں مجموعی طور پر 66 ٹائٹلز اپنے نام کیے۔
پاکستان ٹینس فیڈریشن کے صدر اعصام الحق قریشی نے کہا کہ حکومت پاکستان عالمی سطح پر ملک کا مثبت تشخص اجاگر کرنے کے لیے اقدامات کر رہی ہے، جس کے باعث عالمی شخصیات پاکستان کا رخ کررہی ہیں۔
یہ بھی پڑھیں: معروف پاکستانی ٹینس اسٹار کا ریٹائرمنٹ کا اعلان
انہوں نے مزید کہا کہ بیورن بورگ کا دورہ نہ صرف پاکستان کی عالمی ساکھ کو بہتر بنانے میں مدد دے گا بلکہ ملک میں ٹینس کے فروغ کے لیے بھی اہم سنگ میل ثابت ہوگا۔
فیڈریشن کے سیکریٹری جنرل کرنل ضیاء الدین طفیل اور دیگر حکام نے بھی اس دورے پر خوشی کا اظہار کرتے ہوئے یقین دہانی کرائی کہ ایونٹ کے کامیاب انعقاد کے لیے تمام انتظامات مکمل کیے جائیں گے۔
واضح رہے کہ بیورن بورگ اپنی فیملی کے ہمراہ پاکستان آئیں گے، اور ان کے دورے سے نوجوان کھلاڑیوں کو بھی حوصلہ ملنے کی توقع ہے۔
