خیبر پختونخوا کے علاقے بنوں میں شہری نے اپنی عدالت لگا لی اور ڈرائیور پر بد ترین تشدد کیا۔
ایف آئی آر کے مطابق مبینہ ملزم رحیم اللہ نے اپنے ڈرائیور پرچوری کا الزام لگایا اور بدترین تشدد کا نشانہ بنایا۔
مدعی محمد رضوان نے بتایا کہ ملزم رحیم اللہ نے مجھے 3 روز تک رسیوں سے باندھ کر ایک کمرے میں بند رکھا۔ کوڑے اور بجلی کی تاروں سے تشدد کیا جاتا رہا۔
رضوان نے بتایا کہ ملزم رحیم اللہ چوری قبول کرنے کے لیے بدترین تشدد کرتا رہا اور اس کی ویڈیو بھی بنائی جبکہ مجھے کئی بار قتل کرنے کی بھی کوشش کی گئی۔ تشدد کے دوران میرا گلا بھی دبایا گیا۔
مدعی رضوان نے بتایا کہ اسلحہ سے قتل کرنے کی کوشش پر میں نے منت سماجت کر کے جان چھڑائی۔ مجھے کہا جاتا رہا کہ پولیس میں رپورٹ درج نہیں کرانی۔
دوسری جانب پولیس نے مبینہ ملزم رحیم اللہ کو گرفتار کر کے مقدمہ درج کرلیا ہے۔