وفاقی تعلیمی بورڈ نے میٹرک امتحان کے دوران ایک ایسے واقعے کی تحقیقات شروع کردی ہیں جس میں بیرونِ ملک مقیم طالبعلم کی جگہ ایک اور شخص امتحان دیتا ہوا پکڑا گیا۔
میڈیا رپورٹس کے مطابق حکام نے بتایا ہے کہ ملزم جس کی شناخت نذر کے نام سے ہوئی ہے اور جو ٹیکسلا کا رہائشی بتایا جاتا ہے، نے مبینہ طور پر مذکورہ طالبعلم کے لیے جعلی داخلہ کروایا اور اس کی جگہ امتحان میں شریک ہوا۔
حکام کے مطابق ملزم کے خلاف اس نوعیت کے مقدمات پہلے بھی راولپنڈی بورڈ میں درج ہو چکے ہیں اور وہ مفرور قرار دیا جا چکا ہے۔
یہ واقعہ اسلام آباد کے ایک اسکول میں پیش آیا، جہاں امتحانی مرکز قائم کیا گیا تھا۔ بتایا گیا ہے کہ اصل امیدوار بیرونِ ملک مقیم ہے، تاہم اس کا داخلہ دھوکہ دہی کے ذریعے جمع کروایا گیا۔
امتحانی عملے نے نذر کو امیدوار کی جگہ امتحان دیتے ہوئے پکڑ لیا اور اس کے ساتھ اس عمل میں ملوث مزید 2 افراد کو بھی حراست میں لیا، تاہم بعد ازاں انہیں رہا کر دیا گیا۔
