وزیراعظم محمد شہباز شریف نے ملک کی حالیہ صورتحال اور عالمی سطح پر پیٹرولیم مصنوعات کے دباؤ کے پیش نظر معاشی طور پر کمزور طبقے کو بڑا ریلیف دینے کا فیصلہ کیا ہے۔
وزیراعظم ہاؤس کے اعلامیے کے مطابق وزیراعظم نے موٹر سائیکل سواروں، پبلک ٹرانسپورٹ اور گڈز ٹرانسپورٹ کے لیے گزشتہ ماہ دی جانے والی سبسڈی کی مدت میں مزید ایک ماہ کی توسیع کردی ہے۔
یہ بھی پڑھیں: پیٹرول پرسبسڈی،وفاقی حکومت کا کم آمدن افرادکے لیے بڑا اعلان
وزیراعظم نے واضح کیا ہے کہ مشکل معاشی حالات کے باوجود حکومت اربوں روپے کے قومی ریلیف پیکیج کے ذریعے عام آدمی کو تحفظ فراہم کرتی رہے گی اور کرایوں میں کسی بھی غیر قانونی اضافے کو روکنے کے لیے مؤثر نگرانی کو یقینی بنایا جائے گا۔
دوسری جانب وزیراعظم شہباز شریف نے ’اپنا گھر پروگرام‘ کے تحت کم و متوسط آمدنی والے افراد کے لیے بڑے ہاؤسنگ پیکیج کا آغاز کردیا ہے، جس کے تحت آسان اقساط پر گھروں کی خریداری کے لیے اربوں روپے کی فنانسنگ فراہم کی جائے گی۔
وزیراعظم شہباز شریف نے ’اپنا گھر پروگرام‘ کے تحت ایک بڑے ہاؤسنگ پیکیج کا افتتاح کر دیا، جس کا مقصد ملک میں بے گھر اور کم آمدنی والے افراد کو اپنی چھت فراہم کرنا ہے۔ افتتاحی تقریب میں مختلف بینکوں کی جانب سے اہل افراد میں قرض کے چیک بھی تقسیم کیے گئے۔
یہ بھی پڑھیں: آئی ایم ایف کا پاکستان کو ایندھن سبسڈی ختم، ٹیکس نیٹ وسیع کرنے کا مشورہ
اس اسکیم کے تحت شہریوں کو گھر کی خریداری کے لیے 25 لاکھ سے ایک کروڑ روپے تک کے قرضے 20 سال کی مدت کے لیے فراہم کیے جائیں گے۔ حکومتی تفصیلات کے مطابق 25 لاکھ روپے کے قرض پر ماہانہ قسط 16 ہزار 999 روپے، 50 لاکھ پر 32 ہزار 997 روپے، 75 لاکھ پر 49 ہزار 497 روپے جبکہ ایک کروڑ روپے کے قرض پر ماہانہ قسط 65 ہزار 996 روپے مقرر کی گئی ہے۔
اسکیم کے تحت قرض حاصل کرنے کے لیے قومی شناختی کارڈ کا حامل ہونا اور پہلے سے کسی مالی ادارے کا مقروض نہ ہونا لازمی شرط قرار دی گئی ہے۔ قرض کی رقم سے 10 مرلہ تک کا پلاٹ یا تیار شدہ گھر خریدا جا سکے گا، جبکہ مجموعی لاگت کا 90 فیصد حکومتی فنانسنگ اور 10 فیصد درخواست گزار کو خود فراہم کرنا ہوگا۔
یہ قرض اسلامی و کمرشل بینکوں، مائیکرو فنانس بینکوں اور ہاؤس بلڈنگ فنانس کمپنی کے ذریعے حاصل کیا جاسکے گا۔
