صحافی ارشد شریف مرحوم کی والدہ نے چیئرمین تحریک انصاف عمران خان، فیصل واوڈا، سلمان اقبال، مراد سعید اور صحافی عمران ریاض کو شامل تفتیش کرنے کے لیے سپریم کورٹ میں درخواست دائر کر دی۔
ارشد شریف کی والدہ نے درخواست میں کہا ہے کہ’ مقدمہ کی حساسیت اور اہمیت کے پیش نظر سپریم کورٹ کے اقدام کو سراہتی ہوں، ارشد شریف کے قتل کی تحقیقات پاکستان میں ہونے والی سازش سے شروع کی جائیں۔
انہوں نے درخواست میں موقف اختیار کیا ہے کہ متعدد افراد نے ارشد شریف کے قتل کی سازش بارے میں جاننے کا دعوی کیا ہے۔ انہوں نے کہا کہ انہیں فیکٹ فائنڈنگ کمیٹی رپورٹ ملی اور نہ ہی جے آئی ٹی رپورٹ فراہم کی گئی۔
درخواست میں استدعا کی گئی ہے کہ سپریم کورٹ جے آئی ٹی سربراہ کو 5 افراد کو تحقیقات میں شامل کرنے کا حکم دے۔ ارشد شریف کے قتل سے متعلق ان تمام افراد سے شواہد حاصل کیے جائیں۔ اور سپریم کورٹ جے آئی ٹی کی رپورٹس فراہم کرنے کا حکم دے۔
