وزیراعظم شہباز شریف سے سعودی پاک جوائنٹ بزنس کونسل کے چیئرمین ہز ہائینس شہزادہ منصور بن محمد آل سعود کی قیادت میں اعلیٰ اختیاراتی سعودی تجارتی وفد نے وزیراعظم ہاؤس میں اہم ملاقات کی ہے، جس میں دونوں ممالک کے مابین تجارتی تعلقات اور مختلف شعبوں میں سرمایہ کاری کو فروغ دینے پر تفصیلی تبادلہ خیال کیا گیا۔
اس اعلیٰ سطح کی بیٹھک میں نائب وزیراعظم و وزیر خارجہ سینیٹر محمد اسحاق ڈار، وزیر برائے نیشنل فوڈ سیکیورٹی رانا تنویر حسین، وزیر مواصلات علیم خان، وزیر پاور ڈویژن سردار اویس احمد خان لغاری، وزیر پٹرولیم علی پرویز ملک، وزیر آئی ٹی محترمہ شزہ فاطمہ خواجہ، وزیر مملکت برائے خزانہ و ریلوے بلال اظہر کیانی، وزیراعظم کے معاونین خصوصی طارق فاطمی، ہارون اختر خان اور دیگر اعلیٰ سرکاری افسران بھی موجود تھے۔
یہ بھی پڑھیں: پاکستان سعودی عرب کی خودمختاری کے لیے ہمیشہ ساتھ کھڑا رہے گا، پاکستانی سفیر احمد فاروق
ملاقات کے دوران وزیراعظم نے سعودی وفد کا پاکستان میں پرتپاک خیرمقدم کرتے ہوئے کہا کہ پاکستان سعودی عرب کے ساتھ اپنے اقتصادی تعلقات کو باہمی طور پر فائدہ مند اقتصادی شراکت داری کی شکل دینے کا خواہاں ہے۔
انہوں نے اکتوبر 2025 میں ہز ہائینس شہزادہ منصور اور سعودی تجارتی وفد کے دورہ پاکستان کا ذکر کرتے ہوئے امید ظاہر کی کہ موجودہ دورہ دونوں فریقین کو مختلف شعبوں میں بات چیت بڑھانے اور مفاہمت کی یادداشتوں سمیت متعدد اہم معاہدوں پر دستخط کرنے میں مدد فراہم کرے گا۔
وزیراعظم نے اس موقع پر خادمین حرمین شریفین ہز میجیسٹی کنگ سلمان بن عبدالعزیز آل سعود اور ولی عہد عزت مآب شہزادہ محمد بن سلمان کے لیے اپنی نیک خواہشات کا اظہار بھی کیا۔
عزت مآب شہزادہ منصور بن محمد آل سعود نے پرتپاک استقبال اور بہترین مہمان نوازی پر وزیراعظم کا شکریہ ادا کیا اور سعودی حکومت کے ساتھ ساتھ کاروباری برادری کی جانب سے پاکستان کے ساتھ متعدد شعبوں میں کاروباری روابط کو بڑھانے کی شدید خواہش کا اظہار کیا۔
انہوں نے پاکستان میں بندرگاہوں، شاہراہوں، ہوائی اڈوں کی آؤٹ سورسنگ، توانائی، بجلی کی تقسیم اور آئی ٹی سیکٹر وغیرہ سے متعلق اہم منصوبوں میں سرمایہ کاری میں سعودی عرب کی گہری دلچسپی سے آگاہ کیا۔
یہ بھی پڑھیں: پاکستانی سفیر کی سعودی عرب میں اپنے شہریوں کو سوشل میڈیا کے ذمہ دارانہ استعمال کی ہدایت
وزیراعظم نے ایسے متنوع شعبوں میں سعودی سرمایہ کاری کا خیرمقدم کیا اور یہ تجویز بھی پیش کی کہ زراعت اور غذائی تحفظ ایک اور اہم ترین ترجیحی شعبہ ہو سکتا ہے جس میں دونوں ممالک باہمی طور پر فائدہ مند مواقع تلاش کر سکتے ہیں۔
واضح رہے کہ سعودی تجارتی وفد ولی عہد شہزادہ محمد بن سلمان کے ویژن کے مطابق پاکستان میں سعودی سرمایہ کاری کو بڑھانے کے لیے اپنے اس دورے کے دوران اہم سرکاری اور نجی شعبے کے شراکت داروں سے مزید تفصیلی ملاقاتیں بھی کرے گا۔
