وفاقی وزیر و پاکستان مسلم لیگ ن کے سینیئر رہنما میاں جاوید لطیف نے کہا ہے کہ سانحہ 9 مئی کے بعد پاکستان پر انگلیاں اٹھائی جا رہی ہیں تو سہولت کار یا خود کش جیکٹ بنانے والے کس طرح بچ سکتے ہیں۔
لاہور میں پریس کانفرنس کرتے ہوئے انہوں نے کہا کہ 9 مئی کے واقعہ کو ایک ماہ گزر گیا ہے اس عرصہ میں ریاست نے کیا کھویا اور اداروں نے کیا سیکھا۔
جاوید لطیف کا کہنا تھا کہ عمران خان نے بمبار جیکٹ پاکستان کو نقصان پہنچانے کے لیے پہنی۔ 3 اداروں کی طرف سے مجسمہ بنایا گیا اور اس کی شاخیں عالمی قوتیں سے ملتی ہیں قوم کو اس کے ثبوت دکھائے جائیں۔
وفاقی وزیر جاوید لطیف لاہور میں پریس کانفرنس کر رہے ہیںhttps://t.co/Xe5uMVWKkT
— PMLN (@pmln_org) June 11, 2023
انہوں نے کہا کہ نوازشریف کے ساتھ 2017 میں زیادتی ہوئی اور پانامہ پر سزا دی گئی۔ ایسا کرنا قومی کے ساتھ زیادتی تھی۔
ان کا کہنا تھا کہ نواز شریف کے ساتھ جو زیادتی کی گئی اس کا مداوا ہونا چاہیے اور پاکستان میں وقت پر عام انتخابات ہونے چاہییں۔ اداروں کے کردار معافی مانگیں اور نواز شریف کو ریڈ کارپٹ بچھا کر بلایا جائے۔ ادارے کے حاضر سروس بتائیں کہ ملکی معیشت و سی پیک کو کمزور کرنے کے لیے کس کی سہولت کاری کی۔
انہوں نے کہا کہ سانحہ 9 مئی کے ذمہ دار واشنگ مشین میں صاف نہیں ہو سکتے۔ اگر ان کرداروں کو صاف کیا گیا تو کل اس سے بھی بڑا واقعہ رونما ہو سکتا ہے۔
مزید پڑھیں
جاوید لطیف نے کہا کہ اگر کوئی سمجھتا ہے کہ کچھ لوگ وفاداری تبدیل کر کے کسی دوسری جماعت میں شامل ہو جائیں گے تو ایسے ملک نہیں چلے گا۔
جاوید لطیف کا کہنا تھا کہ استحکام پاکستان پارٹی میں جو لوگ شامل ہوئے ہیں وہ عمران خان کے حوالے سے سچ قوم کو بتائیں۔ اگر سچ نہیں بولیں گے تو انگلی اٹھے گی۔
انہوں نے کہا کہ 9 مئی کے واقعہ میں ملوث ڈاکٹر یاسمین راشد، پرویز الٰہی کو ثبوتوں کے باوجود چھوڑا جائے گا تو عدلیہ سے اعتماد اٹھ جائے گا۔ عدل کے نظام سے انہیں سہولت ملتی رہے گی تو عدلیہ پر اعتماد کون کرے گا۔
جاوید لطیف نے کہا کہ اب چھوٹے چھوٹے گروپ بنانے سے پاکستان نہیں چلے گا۔ مسلم لیگ ن اپنے پلیٹ فارم سے شیر کے نشان پر انتخابات میں حصہ لے گی۔ لیول پلیئنگ فیلڈ دی جائے لیکن نواز شریف کو موقع کیوں نہیں دیا جا رہا۔
انہوں نے کہا کہ سانحہ ماڈل ٹاؤن پر کہا گیا کہ ن لیگ کو پھانسی پر لٹکا دو۔ آج ارشد شریف کا قتل ہونے پر ان کی ماں کی آواز کیوں سنائی نہیں دیتی۔ قتل کرنے والا معروف ہو یا کچے کا ڈاکو ہو سزا ایک جیسی ہونی چاہیے۔
جاوید لطیف نے کہا کہ تمام اداروں کے لوگوں سے اپیل ہے کہ پاکستان پر رحم کریں۔ حقیقت سے پردہ اٹھائیں۔ اگر مجھے پھانسی لگتی ہے تو لگا دیں لیکن ملک کو چلائیں۔
انہوں نے کہا کہ ن لیگ کسی کے ساتھ سیٹ ایڈجسٹمنٹ کسی صورت نہیں کررہی۔ آئین و قانون کی بالادستی ہمارا منشور تھا اور ہے۔ اداروں کے لوگ آئین سے ماورا قدم اٹھاتے ہیں تو ملک کو نقصان پہنچتا ہے۔
