پاکستان کرکٹ ٹیم کے مایہ ناز بیٹر بابر اعظم نے ویمنز ٹی20 ورلڈ کپ 2026 میں شرکت کرنے والی قومی ویمنز ٹیم کے لیے نیک تمناؤں کا اظہار کرتے ہوئے قوم سے ان کی بھرپور حوصلہ افزائی کی اپیل کی ہے۔
بابر اعظم نے سوشل میڈیا پر اپنے پیغام میں کہاکہ ٹی20 ورلڈ کپ کے لیے پاکستان ویمنز ٹیم کے لیے ہماری نیک خواہشات ہیں۔
Wishing good luck to our national women’s team for #T20WorldCup. Pakistan ka parcham apke haath me aur qoum ki duayen apke sath hain. Go make us proud.
Pakistan, it’s time to #BackOurGirls. 🇵🇰
— Babar Azam (@babarazam258) June 14, 2026
انہوں نے کہاکہ قومی پرچم اب ان کھلاڑیوں کے ہاتھ میں ہے اور پوری قوم کی دعائیں ان کے ساتھ ہیں، وہ میدان میں اتریں اور اپنی بہترین کارکردگی سے ملک کا نام روشن کرتے ہوئے قوم کا سر فخر سے بلند کریں۔
قومی بیٹر نے اس موقع پر یہ بھی کہاکہ اب وقت آگیا ہے کہ ہم اپنی کرکٹرز کی بھرپور حمایت کریں اور ان کی حوصلہ افزائی کریں۔
واضح رہے کہ ویمنز ٹی20 ورلڈ کپ 2026 میں پاکستان ویمنز ٹیم آج اپنے مہم کا آغاز روایتی حریف بھارت کے خلاف میچ سے کرے گی۔
پاکستان ٹیم کی فاطمہ ثنا کی زیرِ قیادت گرین شرٹس روایتی حریف کے خلاف تاریخی فتح حاصل کرنے کے لیے مکمل اعتماد کے ساتھ میدان میں اترنے کے لیے تیار ہیں۔ یہ بڑا میچ برمنگھم کے تاریخی اسٹیڈیم ایجبسٹن میں کھیلا جائے گا۔
میچ سے قبل پاکستانی کیمپ سے ایک پریشان کن خبر سامنے آئی جب قومی ٹیم کی کپتان فاطمہ ثنا نیٹ پریکٹس کے دوران دائیں گھٹنے پر گیند لگنے سے انجری (چوٹ) کا شکار ہو گئیں۔
میڈیا رپورٹ کے مطابق ہفتہ کے روز بیٹنگ سیشن کے دوران عائشہ ظفر نے ایک سیدھا شاٹ کھیلا، جس پر بالنگ کے بعد فالو تھرو (شاٹ کے بعد ایکشن مکمل کرنے کا عمل) کے دوران گیند تیز رفتاری سے فاطمہ ثنا کے گھٹنے سے جا ٹکرائی۔
تاہم، نوجوان کپتان نے بہادری کی مثال قائم کرتے ہوئے اس واقعے کو معمولی قرار دیا اور مداحوں کو یقین دہانی کرائی کہ وہ اب بالکل ٹھیک ہیں اور میچ کے لیے دستیاب ہوں گی۔
