پاکستان میں ریئلٹی مقابلوں کے شوز کی فہرست میں ایک اور بڑا اضافہ ہونے جارہا ہے، کیونکہ پاکستانز گاٹ ٹیلنٹ کا آغاز 4 جولائی سے ہوگا، شو کا نیا ٹریلر جاری کردیا گیا ہے، جس کے مطابق یہ پروگرام ہر ہفتے ہفتہ اور اتوار کو جیو انٹرٹینمنٹ پر نشر کیا جائے گا۔
شو کے ججز میں اداکارہ مہوش حیات، گلوکار علی ظفر، کامیڈین تابش ہاشمی اور شارک ٹینک پاکستان سے تعلق رکھنے والے عثمان بشیر شامل ہیں، جو مختلف شعبوں سے تعلق رکھنے والے باصلاحیت امیدواروں کی صلاحیتوں کا جائزہ لیں گے۔
یہ بھی پڑھیں: ’شارک ٹینک پاکستان سے زیادہ بھارت میں دیکھا جائے گا‘، معروف ریئلٹی شو سے متعلق لوگ کیا کہہ رہے ہیں؟
گزشتہ سال اگست میں پکسل انٹرٹینمنٹ نے عالمی تفریحی ادارے فریمنٹل کے ساتھ معاہدے کا اعلان کیا تھا، جس کے تحت دنیا کے مقبول ترین ریئلٹی شو فارمیٹ گاٹ ٹیلنٹ کو پہلی بار پاکستان میں پیش کیا جارہا ہے۔
View this post on Instagram
یہ فارمیٹ برطانوی ٹی وی شخصیت سائمن کاویل نے تخلیق کیا تھا اور اس کے حقوق فریمنٹل کے پاس ہیں۔ یہ شو اب تک 70 سے زائد ممالک میں نشر ہو چکا ہے اور دنیا کے کامیاب ترین ریئلٹی ٹی وی فارمیٹ کا گنیز ورلڈ ریکارڈ بھی اپنے نام رکھتا ہے۔
یہ بھی پڑھیں: بگ باس 19 کے فاتح گورو کھنہ کو تاحال انعامی رقم نہ مل سکی
پاکستانز گاٹ ٹیلنٹ میں گلوکار، رقاص، جادوگر، کامیڈین، ایکروبیٹس، بیٹ باکسرز اور دیگر منفرد صلاحیتوں کے حامل افراد کو اپنی صلاحیتیں دکھانے کا موقع ملے گا۔ ملک بھر سے اوپن آڈیشنز بھی منعقد کیے جائیں گے تاکہ مختلف شہروں اور علاقوں سے باصلاحیت افراد کو قومی سطح پر اپنی پہچان بنانے کا موقع مل سکے۔
پاکستانز گاٹ ٹیلنٹ، ریپ آئیکون پاکستان، ماسٹر شیف پاکستان، شارک ٹینک پاکستان اور پاکستان آئیڈل کے بعد ملک میں ریئلٹی مقابلوں پر مبنی شوز کی بڑھتی ہوئی مقبولیت کا ایک اور اہم اضافہ ثابت ہوسکتا ہے۔
