اسٹیٹ بینک آف پاکستان نے عام شہریوں، نوجوانوں، خواتین، اوورسیز پاکستانیوں اور کاروباری اداروں کے لیے ’انویسٹ پاک‘ کے نام سے ایک جدید ڈیجیٹل سرمایہ کاری پورٹل اور موبائل ایپلیکیشن کا باضابطہ آغاز کر دیا ہے۔
یہ بھی پڑھیں: ’انویسٹ پاک‘ پورٹل کا افتتاح: پاکستان میں سرمایہ کاری کے وسیع مواقع موجود ہیں، وزیر خزانہ
واضح رہے کہ اس پلیٹ فارم کے ذریعے اب صرف 5 ہزار روپے سے حکومتِ پاکستان کی سیکیورٹیز میں براہ راست سرمایہ کاری ممکن ہو گی۔
اس اقدام کا بنیادی مقصد عوام کے لیے حکومتی سیکیورٹیز تک رسائی کو آسان بنانا، مالیاتی شمولیت کو فروغ دینا، سرمایہ کاری کے عمل کو مکمل طور پر ڈیجیٹل کرنا اور معیشت کو دستاویزی شکل دینا ہے۔
افتتاحی تقریب سے خطاب کرتے ہوئے وفاقی وزیر خزانہ و محصولات سینیٹر محمد اورنگزیب نے کہا کہ انویسٹ پاک ملک میں سرمایہ کاری کے ایک نئے دور کا آغاز ہے۔ ان کے مطابق یہ پلیٹ فارم عام شہریوں کو محفوظ، شفاف اور آسان انداز میں حکومتی سرمایہ کاری کے مواقع فراہم کرے گا جبکہ حکومت کے لیے سرمایہ کاری کے ذرائع بھی وسیع ہوں گے۔
انہوں نے زور دیا کہ اس سے بینکوں پر حکومت کے انحصار میں کمی آئے گی اور نجی شعبے کو قرضوں کی فراہمی میں اضافہ ہو گا۔
سرمایہ کاری کا طریقہ کار
اسٹیٹ بینک کے مطابق سرمایہ کار InvestPak ویب پورٹل (investpak.sbp.org.pk) یا اس کی موبائل ایپ کے ذریعے آسانی سے رجسٹریشن مکمل کر کے Investor Portfolio Securities (IPS) اکاؤنٹ کھول سکتے ہیں۔
شناختی تصدیق (e-KYC) کے بعد بینک اکاؤنٹ، Raast یا دیگر منظور شدہ ڈیجیٹل ادائیگی کے ذرائع سے رقم منتقل کر کے ٹریژری بلز (T-Bills)، پاکستان انویسٹمنٹ بانڈز (PIBs)، گورنمنٹ اجارہ سکوک اور دیگر دستیاب حکومتی سیکیورٹیز میں سرمایہ کاری کی جا سکے گی۔
ریٹیل سرمایہ کار صرف 5 ہزار روپے سے آغاز کر سکتے ہیں جبکہ کارپوریٹ اور ادارہ جاتی سرمایہ کاروں کے لیے بھی سہولتیں فراہم کی گئی ہیں۔ پورا عمل آن لائن ہونے کی وجہ سے بینک برانچ کا چکر لگانے کی ضرورت تقریباً ختم ہو جائے گی اور سرمایہ کاری کا عمل گھر بیٹھے ممکن ہو گا۔
منافع کی شرح کتنی ہوگی؟
اسٹیٹ بینک نے واضح کیا ہے کہ انویسٹ پاک پر کوئی مقررہ یا گارنٹی شدہ منافع نہیں دیا جائے گا۔ سرمایہ کار کو حاصل ہونے والا ریٹرن اس سیکیورٹی کی مارکیٹ یِلڈ پر منحصر ہوگا جس میں وہ سرمایہ کاری کرے گا۔ ٹریژری بلز اور پاکستان انویسٹمنٹ بانڈز کی نیلامیوں میں طے ہونے والی شرح سود اسٹیٹ بینک کی مانیٹری پالیسی، مارکیٹ کے حالات اور معاشی اشاریوں کے مطابق تبدیل ہوتی رہتی ہے۔
سرمایہ کار پورٹل پر دستیاب فنانشل کیلکولیٹر اور حقیقی وقت کی مارکیٹ معلومات سے اپنے ممکنہ منافع کا اندازہ لگا سکتے ہیں۔
عام آدمی کو کیا فائدہ ہوگا؟
قائداعظم یونیورسٹی کے سکول آف اکنامکس کے پروفیسر ڈاکٹر انور شاہ کے مطابق اس پلیٹ فارم کا سب سے بڑا فائدہ محدود آمدنی والے افراد، نوجوانوں اور خواتین کے لیے حکومتی سیکیورٹیز میں براہ راست رسائی ہے۔
ماضی میں یہ عمل پیچیدہ اور بینکوں یا بروکرز کے ذریعے ہوتا تھا، جس کی وجہ سے عام شہری دور رہتے تھے۔ اب صرف 5 ہزار روپے سے شروع کر کے بچت کو محفوظ اور منافع بخش سرمایہ کاری میں تبدیل کیا جا سکتا ہے۔ آن لائن نظام کی بدولت شفافیت بڑھے گی، لاگت کم ہو گی اور سرمایہ کاری کا عمل تیز اور آسان ہو جائے گا۔ اس کے علاوہ اوورسیز پاکستانی بھی آسانی سے حصہ لے سکیں گے۔
حکومت اور معیشت کو کیا فائدہ ہوگا؟
حکومت کے مطابق انویسٹ پاک کے ذریعے عوامی بچت کو باضابطہ مالیاتی نظام میں لایا جائے گا۔ اس سے نہ صرف حکومت کو کمرشل بینکوں پر انحصار کم کرنا پڑے گا بلکہ بینک نجی شعبے کو زیادہ فنڈز فراہم کرنے کے قابل ہو سکیں گے۔
مزید پڑھیں: پاکستان کے ڈیجیٹل بینکاری نظام پر سرمایہ کاروں کا اعتماد مستحکم، 20 ملین ڈالر کی انویسٹمنٹ کا اعلان
معاشی ماہرین کا خیال ہے کہ اس اقدام سے گھریلو قرضوں کی مارکیٹ کو وسعت ملے گی، سرمایہ کاری کا کلچر فروغ پائے گا، معیشت دستاویزی ہو گی اور مجموعی طور پر مالیاتی استحکام میں اضافہ ہوگا۔
کیا اس میں کوئی خطرہ بھی ہے؟
ڈاکٹر انور شاہ کے مطابق ماہرین کا کہنا ہے کہ حکومتی سیکیورٹیز کو نسبتاً محفوظ سمجھا جاتا ہے کیونکہ ان کی ضمانت حکومتِ پاکستان دیتی ہے۔ تاہم سرمایہ کاروں کو یہ بات ذہن میں رکھنی چاہیے کہ منافع مارکیٹ سے منسلک ہے۔
اگر مستقبل میں شرح سود میں کمی آئی تو نئی سرمایہ کاری پر ریٹرن بھی کم ہو سکتا ہے۔ اس لیے سرمایہ کاری سے پہلے سیکیورٹی کی مدت، شرائط، نیلامی کے نتائج اور مارکیٹ کے رجحانات کا بغور جائزہ لینا ضروری ہے۔ پورٹل پر دستیاب گائیڈ لائنز اور FAQ اس سلسلے میں مددگار ثابت ہوں گے۔
یہ بھی پڑھیے: سعودی پاک انویسٹمنٹ کمپنی پاکستان میں سرمایہ کاری کیسے کر رہی ہے؟
معاشی تجزیہ کاروں کے مطابق اگر انویسٹ پاک کو آسان، شفاف اور صارف دوست رکھا گیا اور اس کی مؤثر آگاہی مہم (پرنٹ، سوشل میڈیا اور ریڈیو کے ذریعے) چلائی گئی تو یہ پاکستان میں بچت اور سرمایہ کاری کے کلچر کو فروغ دینے کی جانب ایک اہم قدم ثابت ہو سکتا ہے۔ تاہم اس کی کامیابی کا انحصار عوامی اعتماد، ڈیجیٹل انفراسٹرکچر کی مضبوطی، آسان رجسٹریشن، بروقت ادائیگیوں اور کال سنٹر کی کارکردگی پر ہوگا۔ اسٹیٹ بینک نے اس سلسلے میں ایک مخصوص کال سنٹر بھی قائم کر دیا ہے۔
