وزیر اطلاعات پنجاب عظمیٰ بخاری نے کہا ہے کہ پنجاب میں ترقی، خوشحالی اور خوبصورتی کے منصوبوں پر بیک وقت کام جاری ہے۔ انہوں نے کہا کہ وزیراعلیٰ مریم نواز شریف کی ہدایت پر پنجاب ڈیولپمنٹ پلان کے تحت 52 شہروں میں ترقیاتی منصوبے جاری ہیں، جبکہ مون سون سے قبل نکاسی آب اور سیوریج کے منصوبوں کو بھی جلد مکمل کرنے کی ہدایت دی گئی ہے۔
وزیر اطلاعات پنجاب عظمیٰ بخاری نے اپنے ایک بیان میں کہا ہے کہ وزیراعلیٰ مریم نواز شریف کی قیادت میں پنجاب بھر میں ترقی، خوشحالی اور شہروں کی خوبصورتی کے منصوبوں پر تیزی سے کام جاری ہے۔ انہوں نے کہا کہ پنجاب ڈیولپمنٹ پلان کے تحت صوبے کے 52 شہروں میں مختلف ترقیاتی منصوبوں پر عملدرآمد جاری ہے، جن کا مقصد شہریوں کو جدید اور معیاری سہولیات فراہم کرنا ہے۔
پنجاب بیوٹیفکیشن منصوبے کے تحت شہروں کو خوبصورت بنایا جا رہا ہے، پنجاب کے تمام شہروں میں بلا تفریق پبلک مارکیٹس کو جدید تقاضوں کے مطابق بنایا جا رہا ہے وزیر اعلیٰ پنجاب مریم نوازشریف پنجاب ڈیویلپمنٹ پلان اور بیوٹیفکیشن پروجیکٹس کی براہ راست خود مانیٹرنگ کر رہی ہیں۔ بیوٹیفکیشن… pic.twitter.com/1XGao3kmGK
— Sabir Mehmood Hashmi (@SabirMehmood26) July 11, 2026
انہوں نے کہا کہ مون سون سیزن سے قبل واٹر سپلائی، سیوریج اور نکاسی آب کے منصوبوں کو ترجیحی بنیادوں پر مکمل کیا جا رہا ہے تاکہ بارشوں کے دوران شہریوں کو مشکلات کا سامنا نہ کرنا پڑے۔ عظمیٰ بخاری نے متعلقہ اداروں کو ہدایت کی کہ مون سون سے پہلے کسی بھی جگہ کھدائی کے بعد گڑھے کھلے نہ چھوڑے جائیں اور تمام ترقیاتی کام بروقت مکمل کیے جائیں۔
وزیر اطلاعات نے کہا کہ ترقیاتی منصوبوں پر عملدرآمد کے دوران حفاظتی اقدامات (سیفٹی میئرز) کا بھی خصوصی خیال رکھا جا رہا ہے تاکہ شہریوں کی جان و مال کے تحفظ کو یقینی بنایا جا سکے۔
انہوں نے کہا کہ پنجاب بیوٹیفکیشن پلان کے تحت صوبے کے مختلف شہروں کو جدید اور خوبصورت بنانے کا عمل بھی جاری ہے۔ اس منصوبے کے تحت عوامی مارکیٹوں، پارکوں، داخلی راستوں اور دیگر عوامی مقامات کو جدید تقاضوں کے مطابق اپ گریڈ کیا جا رہا ہے۔
یہ بھی پڑھیں:وزیراعلیٰ مریم نواز نے سیلاب اور مون سون سے نمٹنے کے لیے پیشگی تیاریوں کی ہدایت کردی
عظمیٰ بخاری کے مطابق منڈی بہاؤالدین، سمبڑیال، چنیوٹ، رحیم یار خان اور اوکاڑہ میں خوبصورت پارکس، جدید مارکیٹیں اور شہر کے داخلی راستے تعمیر کیے جا چکے ہیں، جبکہ سرگودھا، اٹک، گوجرانوالہ، راولپنڈی، شکرگڑھ اور خوشاب میں بیوٹیفکیشن کے منصوبے مکمل ہو چکے ہیں۔
انہوں نے مزید کہا کہ وزیراعلیٰ مریم نواز شریف پنجاب ڈیولپمنٹ پلان اور بیوٹیفکیشن منصوبوں کی خود براہ راست نگرانی کر رہی ہیں۔ ان کا مشن ہے کہ پنجاب کے تمام شہروں کو جدید سہولیات سے آراستہ، صاف ستھرا اور خوبصورت بنایا جائے تاکہ ہر شہر ترقی اور شہری سہولتوں کے اعتبار سے لاہور کے معیار تک پہنچ سکے۔
