کراچی میں انسداد دہشت گردی کی عدالت نے نقیب اللہ مسعود قتل کیس میں ملزمان کی عبوری ضمانت خارج کرتے ہوئے امان اللہ سمیت 6 پولیس اہلکاروں کو جیل بھیجنے کا حکم دے دیا ہے۔
جمعرات کو کراچی میں انسدادِ دہشت گردی کی عدالت میں نقیب اللہ مسعود قتل کیس کی سماعت ہوئی، عدالت نے اسٹیشن ہاؤس آفیسر(ایس ایچ او) امان اللہ اور دیگر 6 پولیس اہلکاروں کی عبوری ضمانت خارج کردی اور ملزمان کو گرفتار کر کے جیل بھیجنے کا حکم دیا۔
ادھر پولیس نے عدالت سے عبوری ضمانت خارج ہوتے ہی تمام 6 ملزمان کو گرفتار کرکے جیل بھیج دیا جب کہ عدالت نے ملزم شعیب عرف شوٹر کی ضمانت میں توثیق کر دی ہے۔
واضح رہے کہ کراچی میں معروف نقیب اللہ قتل کیس میں مبینہ طور پر ملوث ہونے کے الزام میں نامزد پولیس اہلکار روپوش ہو گئے تھے۔
یاد رہے کہ 5 سال قبل ’پولیس مقابلے‘ میں جاں بحق ہونے والے نقیب اللہ مسعود قتل کیس میں7 ملزمان مفرور تھے جنہیں عدالت نے اشتہاری قرار دیا ہوا تھا، وہ انسداد دہشتگردی عدالت میں پیش ہوگئے تھے اور عبور ی ضمانت کے لیے درخواست دائرکر دی تھی جبکہ ان تمام ساتوں ملزمان نے سندھ ہائیکورٹ سے حفاظتی ضمانت حاصل کر لی تھی۔
ملزمان میں سب انسپکٹرامان اللہ مروت، شعیب شوٹرسمیت 7 ملزمان شامل تھے، ملزمان نقیب اللہ قتل کیس میں مقدمے کی ابتدا سے مفرور تھے۔
واضح رہے کہ نقیب اللہ قتل کیس میں مرکزی ملزم راﺅ انوار سمیت 18 افراد کو عدالت پہلے ہی بری کرچکی ہے۔
