لاہور کے علاقے ڈیفنس اے میں وفاقی وزیر اطلاعات عطا اللہ تارڑ کی گاڑی کے قریب ہوائی فائرنگ کے واقعے میں پولیس نے کارروائی کرتے ہوئے ملزم کو اسلحے سمیت گرفتار کرلیا، جبکہ اس کے زیر استعمال گاڑی بھی تحویل میں لے لی گئی۔
پولیس کے مطابق واقعہ گزشتہ رات لاہور کے علاقے ڈیفنس اے میں پیش آیا، جہاں ایک کار سوار نوجوان نے وفاقی وزیر اطلاعات عطا اللہ تارڑ کی گاڑی کو اوورٹیک کیا اور فائرنگ کی۔ واقعے کے بعد پولیس اور سیف سٹی اتھارٹی نے جدید ٹیکنالوجی کی مدد سے ملزم کا سراغ لگا کر اسے گرفتار کرلیا۔
یہ بھی پڑھیں:مشکل وقت میں ریاست بچانے کا فیصلہ، تاریخ وزیراعظم شہباز شریف کے کردار کو یاد رکھے گی، عطا تارڑ
پولیس کا کہنا ہے کہ گرفتار ملزم کی شناخت اسامہ کے نام سے ہوئی ہے، جسے اسلحے سمیت حراست میں لیا گیا ہے، جبکہ اس کے زیر استعمال گاڑی بھی قبضے میں لے لی گئی ہے۔ پولیس واقعے کے مختلف پہلوؤں سے تحقیقات کر رہی ہے۔
وفاقی وزیر اطلاعات عطا اللہ تارڑ نے اپنے بیان میں کہا کہ وہ اپنے اہل خانہ کے ہمراہ جا رہے تھے کہ ایک گاڑی نے بائیں جانب سے ان کی گاڑی کو کراس کیا اور 5 فائر کیے۔ انہوں نے بتایا کہ واقعے کے فوراً بعد متعلقہ گاڑی کا پیچھا کیا گیا اور ناکے پر پولیس کو اطلاع دی گئی، جس کے بعد فوری کارروائی کرتے ہوئے ملزم کو گرفتار کر لیا گیا۔
