برطانیہ کے نئے وزیراعظم اینڈی برنہم نے عہدہ سنبھالنے کے بعد اپنے پہلے خطاب میں ملک کو موجودہ بحرانوں سے نکالنے کے لیے ’سرکٹ بریکر‘ (فیصلہ کن تبدیلی) کی ضرورت پر زور دیتے ہوئے اعلان کیا ہے کہ مہنگائی سے متاثرہ عوام کے لیے ریلیف اقدامات منگل سے نافذ کیے جائیں گے جبکہ رواں سال کے دوران ملک کی بہتری کے لیے ایک جامع 10 سالہ منصوبہ بھی پیش کیا جائے گا۔
یہ بھی پڑھیں: برطانیہ کو نیا وزیراعظم مل گیا، اینڈی برنہم نے شاہ چارلس سے ملاقات کے بعد حکومت سنبھال لی
10 ڈاؤننگ اسٹریٹ کے باہر عوام سے خطاب کرتے ہوئے اینڈی برنہم نے بغیر کسی تحریری نوٹس کے اپنی تقریر کی۔ انہوں نے کہا کہ ان کی تقرری ’غور و فکر اور نئے عزم کا لمحہ‘ ہے اور برطانیہ کو دوبارہ استحکام کی راہ پر گامزن کرنا ہوگا۔
1980 کی دہائی کی پالیسیوں پر تنقید
برنہم نے کہا کہ سنہ 1980 کی دہائی میں کیے گئے بعض فیصلے، جن میں سرکاری اداروں کی نجکاری اور صنعتوں کے خاتمے (ڈی انڈسٹریلائزیشن) کی پالیسیاں شامل تھیں، آج بھی برطانیہ کے مختلف علاقوں پر منفی اثرات مرتب کر رہی ہیں اور ملک ابھی تک ان نقصانات سے مکمل طور پر نہیں نکل سکا۔
His Majesty received in Audience the Rt. Hon. Andrew Burnham MP and requested him to form a new Administration. The Rt. Hon Andrew Burnham MP accepted The King's offer and kissed hands upon his appointment as Prime Minister and First Lord of the Treasury. pic.twitter.com/QGXjt80Tbq
— The Royal Family (@RoyalFamily) July 20, 2026
انہوں نے یاد دلایا کہ وہ گزشتہ 10 برسوں میں اس منصب پر آنے والے چھٹے شخص جبکہ 2016 کے بعد 7ویں وزیراعظم ہیں جو اس بات کی علامت ہے کہ ملک کو سیاسی استحکام کی اشد ضرورت ہے۔
مہنگائی سے ریلیف اور بڑے اصلاحاتی منصوبے
نئے وزیراعظم نے اعلان کیا کہ عوام کو مہنگائی کے اثرات سے بچانے کے لیے ریلیف پیکج کا آغاز منگل سے کیا جائے گا جبکہ بعد ازاں اس کی مالی معاونت اور فنڈنگ کی مکمل تفصیلات بھی سامنے لائی جائیں گی۔
انہوں نے بتایا کہ ان کی حکومت تعلیم کے شعبے میں اصلاحات کرے گی تاکہ نوجوانوں کو بہتر روزگار کے مواقع میسر آسکیں۔ اس کے علاوہ ذہنی صحت کی سہولیات میں اضافہ، مقامی کونسلوں کے تحت مزید رہائشی مکانات کی تعمیر اور فلاحی اخراجات میں پائیدار کمی بھی حکومتی ترجیحات میں شامل ہوں گی۔
برنہم کے مطابق یہ اقدامات عوامی فلاح اور ملکی معیشت کو مضبوط بنانے کا منصفانہ اور دیرپا طریقہ ثابت ہوں گے۔
بے گھر افراد کے مسئلے کا خاتمہ ترجیح
اینڈی برنہم نے کہا کہ سڑکوں پر رہنے والے بے گھر افراد کے مسئلے کا خاتمہ ان کی حکومت کی اولین ترجیح ہوگی اور اس حوالے سے فوری اقدامات کیے جائیں گے۔
کابینہ کی تشکیل کا آغاز
خطاب مکمل کرنے کے بعد اینڈی برنہم اپنی اہلیہ میری فرانس کے ہمراہ 10 ڈاؤننگ اسٹریٹ پہنچے جہاں عملے نے ان کا استقبال کیا۔ اس کے بعد انہوں نے نئی کابینہ کی تشکیل کے لیے مشاورت کا آغاز کردیا۔
کابینہ سازی کا عمل اس سے قبل ہی شروع ہو چکا تھا جبکہ اسی روز جیلوں کے وزیر لارڈ ٹمپسن اپنے عہدے سے مستعفی بھی ہوگئے۔
"Larry likes his breakfast at 9, brunch at 1030 and lunch at noon with plenty of snacks in between. The rest of the job is a doddle" pic.twitter.com/EBWgLxdlr1
— Larry the Cat (@Number10cat) July 20, 2026
برطانوی میڈیا کے مطابق برنہم کی ٹیم نئی کابینہ کے ارکان کے نام سرکاری اعلان تک خفیہ رکھنے کی پالیسی پر عمل کر رہی ہے۔
کیئر اسٹارمر سے اقتدار کی منتقلی
اینڈی برنہم نے چند روز قبل لیبر پارٹی کی قیادت سنبھالی تھی جس کے بعد سابق وزیراعظم کیئر اسٹارمر نے باضابطہ طور پر شاہ چارلس سوم کو اپنا استعفیٰ پیش کیا اور تقریباً 2 سال اقتدار میں رہنے کے بعد خوش دلی کے ساتھ عہدہ نئے وزیراعظم کے حوالے کر دیا۔
مزید پڑھیں: اینڈی برنہم نئے برطانوی وزیراعظم، پیر کو حلف اٹھائیں گے، انہیں کون سے چیلنجز کا سامنا رہے گا؟
برنہم کو توقع ہے کہ وہ معاشی دباؤ، مہنگائی، صحت، رہائش اور روزگار جیسے اہم چیلنجز سے نمٹنے کے لیے اپنی حکومت کے اصلاحاتی ایجنڈے پر فوری عملدرآمد شروع کریں گے۔
